2018-05-20 09:00:00

Veprimtaria javore e Papës dhe e Selisë së Shenjtë


Vatikan: “Asnjë fitim nuk është i ligjshëm, nëse mungon horizonti i promovimit të gjithanshëm të njeriut, i destinacionit universal të të mirave materiale dhe i opcionit preferencial për të varfërit”. E kujton këtë, dokumenti i ri i Selisë së Shenjtë mbi ekonominë e financën, që u paraqit javën e kaluar. “Ҫdo përparim i sistemit ekonomik – lexohet në tekst – nuk mund të konsiderohet i tillë, nëse matet vetëm me parametrat e cilësisë e të frytshmërisë së fitimeve. Duhen pasur parasysh edhe cilësia e jetës dhe mirëqënia, që ky përparim sjell për të gjithë e që nuk kufizohet vetëm në aspekte materiale”.

Vatikan: Papa Françesku u kërkoi ipeshkvijve të Kilit, me të cilët u takua për disa ditë në Vatikan, “ndryshime rrënjësore dhe zgjidhje me afat të shkurtër, të mesëm e të gjatë, të nevojshme për të rivendosur drejtësinë dhe bashkimin kishtar”, pas mungesave të rënda në trajtimin e çështjeve të abuzimeve në vend. Pas bisedimeve, që përfunduan të enjten, të gjithë anëtarët e Konferencës Ipeshkvnore të Kilit dhanë dorëheqjen, duke e dorëzuar mandatin e tyre në duart e Papës, që të vendosë lirisht për ta. Ati i Shenjtë u kërkoi ta shqyrtojnë sinqerisht gjendjen dhe faktet, që e kanë dobësuar Kishën e viteve të fundit në Kili. E ipeshkvijtë kërkuan publikisht falje për dhimbjen, që u shkaktuan viktimave, vetë Papës, Popullit të Zotit dhe vendit të tyre.

Romë: Sot, në Sheshin e Shën Gjonit, në Lateran, u kremtua “Festa e Popujve 2018”, me temë “Mirëpritni, ashtu si ju mirëpriti Krishti”. Ndërsa në takimin, zhvilluar në orën 10.00, pranë Seminarit të madh Romak, me përfaqësues të botës laike dhe katolike të bashkësive të ndryshme të Romës, u fol për “Kishën në dëgjim”,. Në orën 12.00 u kremtua Mesha, në përfundim të së cilës, në tremen e Bazilikës së Shën Gjonit u shijuan gjellë tipike, përgatitur nga bashkësitë e dhjetë vendeve të ndryshme. Të pranishëm në festë, shumë shqiptarë, edhe ata, me gjellët e  tyre tipike.

Vatikan: - U kremtua 36-vjetori i Këshillit Papnor të Kulturës, themeluar më 20 maj 1982 nga Papa Gjon Pali II, për të favorizuar marrëdhëniet e Selisë së Shenjtë me botën e kulturës.

Toka Shenjte: Në solemnitetin e Rrëshajëve, u themelua kanonikisht një famulli dhe një Vikariat ipeshkvnor për emigrantët dhe refugjatët. Njoftimi  për këtë vendim u bë i njohur më 4 prillin e kaluar, me një komunikatë të Administratorit Apostolik të Jeruzalemit, atë Pierbattista Pizzaballa.

Në Milano të Italisë, pranë dekanatit Giambellino, kryeipeshkvi i Milanos, imzot Mario Delfini, mori pjesë në Mbrëmësoren ekumenike të Rrëshajëve, me këshillin e Kishave kristiane të Milanos.

Aquila (Itali): Në Ditën kushtuar Shën Celestinit V, u kremtua një funksion i posaçëm  fetar, në Bazilikën e Colemaggio-, e cila iu rikthye qytetit e rikthyer në bukurinë e parë, pas tërmetit të 6 prillit 2009.

Senegal: në Popenguine, u organizua “Shtegtimi i 130-të marian me temë: “Mari, na ndihmo t’i themi ‘po’ Zotit”. Nesër, më 21 maj, në Festën e Marisë, Nënë e Kishës, themeluar nga Papa Francesku, do të kremtohet një Meshë solemne, kryesuar nga imzot Benjamin Ndiaye, kryeipeshkëv i Dakar. Do të marrin pjesë besimtarë ardhur nga 7 dioqezat e Senegalit, por edhe shtegtarë nga Gambia, Mauritania e Mali. Shtegtimi marian i  Popenguine ka zanafillë të vjetër: u themelua më 1888, si shenjë nderimi për Notre Dame de la Délivrance – Zojën e Çlirimit, që nderohet posaçërisht në Francë. Po sivjet ishte edhe çast i rëndësishëm i dialogut ndërfetar.

Nga Rripi i Gazës, dëshmia e një famullitari, atë Mario Da Silva, pas zhvendosjes së ambasadës së SHBA-ve nga Tel Avivi në Jeruzalem e pas ndeshjeve të palestinezëve me policinë. “Dhuna e urrejtja – nënvizon famullitari – lindin edhe nga kushtet e padrejtësisë, në të cilat jeton popullsia. Urgjentisht, duhet zgjidhur problemi i varfërisë, që e ngacmon edhe më shumë popullsinë e rraskapitur aq shumë, sa të zemërohet në kulm”. Pikërisht mbrëmë, në të gjitha kishat katolike, në prag të Rrëshajëve, të krishterët u lutën për paqen në Gazë e në Tokën Shenjte.

Në rajonet anglofone të Kamerunit, po ushtrohet “dhunë çnjerëzore, e verbër, e përbindshme e po radikalizohen qëndrimet”: këtë deklaratë e bëjnë ipeshkvijtë e vendit, të cilët shprehin shqetësimin e tyre të thellë për krizën shoqëroro-politike në dy rajone, ku diskriminohet 20 % e popullsisë. Në tetor 2016, ato janë deklaruar të pavarura nga qeveria qendrore e kjo ka shkaktuar ndeshje të vazhdueshme me forcat qeveritare, gjatë të cilave kanë gjetur vdekjen 150 vetë, 160 mijë të tjerë janë detyruar të shpërngulen e rreth 26 mijë vetë kanë ikur në Nigeri.








All the contents on this site are copyrighted ©.