Thirrje e Papës Françesku, në audiencën e përgjithshme: “Atyre që kanë përgjegjësi politike të drejtpërdrejtë, u kërkoj të marrin guximin e shpresës, duke u bërë ‘artizanë të paqes’, ndërsa i nxis të vijojnë me besim udhën e filluar, për të mirën e të gjithëve”.
Është plot me shpresë, thirrja që bëri Papa për gadishullin korean, në audiencën e sotme të përgjithshme. Samiti ndër-korean, në program për datën 27 prill, në Panmunjeom, është rast i përshtatshëm - tha Papa - për të nisur dialogun transparent, udhën konkrete të pajtimit dhe përtëritjen e vëllazërisë.
Shpresa për procesin e shkrirjes së akujve, në gadishullin korean
Takimi i rangut të lartë, në të cilin marrin pjesë presidentët e dy Koreve, Moon Jae-in e Kim Jong Un, do të jetë i treti, që nga viti 1953, kur përfundoi lufta në Kore. Lojërat olimpike dimërore, zhvilluar kohët e fundit në PyeongChang, në të cilat mori pjesë edhe një delegacion verikorean, si dhe ndërprerja e provave me raketa, sipas njoftimit të Koresë së Veriut, janë etapat e fundit qetësuese të porcesit të shkrirjes së akujve, që shoqëron këtë takim vendimtar.
Nxitja e Papës për guximin e shpresës
Papa siguron se do të lutet personalisht e do të jetë, së bashku me mbarë Kishën, pranë popullit korean, që e dëshiron aq shumë paqen. Selia e Shenjtë e shoqëron, e mbështet dhe e inkurajon çdo nismë të dobishme e të sinqertë për ndërtimin e një ardhmërie më të mirë, nën shenjën e takimit e të miqësisë ndërmjet popujve.
Atyre, që kanë përgjegjësi politike të drejtpërdrejtë - kujtoi Papa - u kërkoj të kenë guximin e shpresës, duke u bërë “artizanë të paqes”, ndërsa i nxit të vijojnë me besim udhën e nisur për të mirën e të gjithëve”. Papa, në përfundim, tha Atynën, duke i ftuar besimtarët të luten për popullsinë e Koresë së Veriut e për Korenë e Jugut.
All the contents on this site are copyrighted ©. |