Папа ўзначаліў пасяджэнне Рады кардыналаў

23 красавіка 2018 г. у Ватыкане на сваёй 24-й сесіі сабралася Рада кардыналаў па дапамозе Святому Айцу ў кіраванні Касцёлам, паведамляе Зала Друку Апостальскай Сталіцы. Сустрэча працягнецца да серады 25 красавіка. 

Структура была створана 13 красавіка 2013 г. для распрацоўкі рэформы Рымскай курыі і дапамогі Пантыфіку ў рэалізацыі яго місіі кіравання Касцёлам. У ватыканскай заяве нічога не гаворыцца пра канкрэтныя тэмы сустрэчы, але, як паведаміў нядаўна каардынатар Рады, кардынал Оскар Радрыгес Марадзьяга, новая Апостальская канстытуцыя аб Рымскай курыі “амаль гатовая”.

У той жа час гандурасскі іерарх адзначыў, што пры падрыхтоўцы гэтага дакумента яшчэ неабходны этап кансультацый з розным дыкастэрыямі, яго перагляд і ўдасканаленне. Адным з пытанняў, якія трэба дапрацаваць, з’яўляецца роля нунцыяў у адборы кандыдатаў на біскупства. Кардынал папярэдзіў, што над такім сур’ёзным дакументам не можна працаваць у спешцы. “Мы просім Бога, каб Канстытуцыю можна было апублікаваць на працягу года”, - адзначыў ён.

Падчас мінулага пасяджэння, якое прайшло ў Ватыкане 26-28 лютага 2018 г., былі разгледжаны пытанні: тэалагічнага статусу біскупскіх канферэнцый, кадравай сітуацыі ў Ватыкане і Святым Пасадзе, стрымлівання выдаткаў і абароны непаўналетніх.

Была падкрэслена неабходнасць тэалагічнай рэфлексіі адносна сітуацыі вакол Канферэнцый Біскупаў. Кардыналы лічаць, што да гэтага часу недастаткова праяснены статус мясцовых епіскапатаў у якасці суб’ектаў, надзеленых канкрэтнымі паўнамоцтвамі, уключаючы пэўны дактрынальны аўтарытэт. Празмерная цэнтралізацыя, паводле іх, не палягчае, а ўскладняе жыццё Касцёла і перашкаджае яго місійнай дынаміцы. На лютаўскім пасяджэнні было прапанавана новае прачытанне Апостальскага паслання Яна Паўла ІІ “Apostolos Suos” “у духу здаровай дэцэнтралізацыі”, пра якую часта кажа Францішак.