(Ռատիօ Վատիկան) Ուրբաթ, 9 փետրուար 2018-ին, Վատիկանի «Քլեմենթինա» դահլիճէն ներս Ֆրանչիսկոս Պապ ընդունեց «Սանթա Մարթա Խմբակ»ի աւելի քան 100 անդամներ , որոնք Հռոմի մէջ գումարած են իրենց տարեկան ընդհանուր ժողովը, որուն նիւթն էր մարդավաճառութեան ու ստրկութեան նոր ձեւերու քննարկումը, եւ այս առնչութեամբ համաշխարհային հեռանկարներու առաջարկներու ներկայացումը:
Այս առթիւ արտասանած պատգամին մէջ Սրբազան Հայրը գնահատեց Սանթա Մարթա խմբակի անդամներուն ՝ մարդավաճառութեան պատճառներու որոնումին սատարած նպաստին համար, ընդգծելով , որ ստրկութեան նոր ձեւերը տարածուած են ամենուրեք նոյնիսկ մեր հասարակութիւններու ամենէն բարեկեցիկ շրջանակներէն ներս:
Ֆրանչիսկոս Պապ դիտել տուաւ, որ Աստուծոյ՝ Կայէնի ուղղած աղաղակը «ու՞ր է եղբայրդ» խթան կը հանդիսանայ քննարկելու մեղսակցութեան այն բոլոր ձեւերը, որոնց միջոցաւ ընկերութիւնը թոյլ կու տայ ու կը քաջալերէ՝ այր մարդոց եւ կիներու չարաշահումը, յատկապէս մարդավաճառութեան ծիրէն ներս:
Ան յորդորեց որ մարդավաճառութեան դէմ ուղղուած բոլոր նախաձեռնութիւնները՝ ոճրագործական ցանցերու բացայայտումի շօշափելի ծրագիրէն ներս, պէտք է միշտ նկատի առնեն լայն շրջանակներ, ինչպէս արհեստավարժութեան եւ հաղորդամիջոցներու պատասխանատու օգտագործումը կամ տնտեսական աճումի բարոյական հետեւանքներու ուսումնասիրութիւնը, ուր շահոյթը առաջնահերթ կը նկատուի քան մարդիկ:
Ֆրանչիսկոս Պապ ապա մաղթեց որ ժողովի ընթացքին քննարկուած նիւթերը նպաստեն այդ յանցագործութիւններու զոհերուն օժանդակութեան աճող կարիքի իրազեկութեան, զանոնք ներգրաւելով ընկերութեան մէջ եւ վերականգնելով անոնց մարդկային արժանապատուութիւնը:
Սրբազան Հայրը ընդգծեց նաեւ որ Եկեղեցին միշտ երախտապարտ է այն բոլոր ջանքերուն համար որոնք ի գործ կը դրուին՝ աստուածային ողորմածութեան բալասանը փոխանցելու բոլոր տառապողներուն, այս մէկը նկատելով էական քայլ ՝ ընկերութեան վերականգման գործընթացէն ներս:
Ֆրանչիսկոս Պապ եզրափակեց իր խօսքը, շնորհակալութիւն յատնելով Սանթա Մարթա խմբակի անդամներուն մարդավաճառութեան դէմ պայքարելու յանձնառութեան համար շնորհելով անոնց Առաքելական օրհնութիւնը։
All the contents on this site are copyrighted ©. |