Прадстаўнікі язідаў прыедуць у Ватыкан

Пантыфік сустрэнецца 24 студзеня 2018 г. з прадстаўнікамі язідызму. Гэта сінкрэтычная рэлігія, якая спалучае ў сабе ўсходнія вераванні з элементамі ісламу. Менавіта таму з яе вызнаўцамі настолькі жорстка змагаюцца радыкальныя мусульмане, якія лічаць іх ератыкамі. Язіды жывуць у асноўным у Іраку, і менавіта там яны дасведчылі пераслед з боку экстрэмісцкай групоўкі “Ісламская дзяржава”.

Візіт прадстаўнікоў язідызму ў Ватыкан з’яўляецца вельмі важнай падзеяй, лічыць кардынал Фернанда Філоні, прэфект Кангрэгацыі евангелізацыі народаў. У мінулым ён быў нунцыем у Багдадзе, а тры гады таму адправіўся ў якасці спецыяльнага пасланніка Папы ў іракскі Курдыстан, дзе сустракаўся з бежанцамі, ахвярамі "Ісламскай дзяржавы". Сустрэча з Пантыфіка з язідамі нагадае свету пра іх трагічны лёс, паведаміў ватыканскі іерарх.

Ён заўважыў, што і ў мінулым Пантыфікі цікавіліся лёсам язідаў. Ужо ў 1927 г. Пій XI загадаў дамініканам, якія працавалі ў рэгіёне, клапаціцца пра вызнаўцаў гэтай рэлігіі. У апошнія гады Францішак асаблівым чынам займаўся гэтай групай у кантэксце высялення хрысціян і язідаў з раёна Масула, з Нінэвіійскай раўніны. 

“Я сам асабіста меў магчымасць сустрэцца з гэтымі супольнасцямі, іх лідэрамі, быў сведкам велізарных пакут, якія перажылі гэтыя сем’і. Многія з іх страцілі сваіх блізкіх. Некаторым удалося ўцячы. Там, дзе хрысціян выганялі, язідаў забівалі, прадавалі ў рабства, асабліва маладых жанчын, чый кошт быў усталяваны на ўзроўні некалькіх долараў. Яны звычайна заканчвалі сексуальнымі рабынямі”, - паведаміў кардынал Філоні. 

Ён лічыць, што знаходжанне вызнаўцаў гэтай рэлігіі ў Ватыкане будзе вельмі важным для іх, асабліва з псіхалагічнага пункту гледжання, але не толькі. Гэта таксама будзе важным палітычным падтэкстам. Акрамя таго, пасадзейнічае ўмацаванню сувязяў ўзаемнага даверу, якія ўжо дастаткова моцныя.