(Ռատիօ Վատիկան) Ամէն տարի՝ 18 Յունուարէն մինչեւ 25 յունուար, աշխարհի համայն եկեղեցիներու մէջ, կը նշուի քրիստոնեաներու միութեան աղօթքի ութօրէքը, որուն ընթացքին քրիստոնեայ աշխարհը աղօթքներ կը բարձրացնէ առ Աստուած` հայցելու համար քրիստոնեաներու միութիւնը։
Ամէն տարի այս շաբթուայ ընթացքին կ՛ընտրուի յատուկ աղօթքի խորհրդածութեան նիւթ մը եւ 2018-ի խորհրդածութեան նիւթը ներշնչուած է Ելից գիրքէն «Քու աջդ ով Տէր փառաւորեալ է զօրութեամբ (Ելք 15,6)» մինչ խորհրդածութիւններու շարքը պատրաստած են Քրիստոնեաներու միութեան խթանումի Քահանայապետական խորհուրդը եւ Եկեղեցիներու համաշխարհային խորհուրդի «հաւատք եւ սահմանադրութիւն» յանձնախումբը։
Քրիստոնեաներու միութեան շաբթուայ աղօթքի սովորութեան ծագումը վերագրուած է բողոքական եւ անկլիքան եկեղեցիներու պատկան երկու կղերականներու` անգլիացի Սփենսէր Ժոնսը եւ Ամերիկացի Փոլ Ժէյմս Ֆրանսիս Ուաթսոնը, որոնք 1907-ին սկիզբ տուած են սոյն աւանդութեան որ աւելի ուշ որդեգրուած է նաեւ Կաթողիկէ Եկեղեցւոյ կողմէ եւ 1948-ին` ''Եկեղեցիներու միութենական խորհուրդի'' ստեղծումէն ետք ու դարձած է համամիութենական աղօթքի շաբաթ, որուն ընթացքին համայն քրիստոնեաները կ՛աղօթեն եկեղեցիներու միութեան ու անոնց դէպի Քրիստոս դարձին որպէսզի իրականացուի Յիսուսին «Հայր որպէսզի անոնք մի ըլլան» աղօթքը ։
Յունուար 18 եւ 25 թուականներու ընտրութիւնը ապա առաջարկած է վերապատուելի Փոլ Ուաթսոնը 1908-ին, նկատի առնելով Սուրբ Պետրոսի գահին տօնը` 18 յունուարին եւ Սուրբ Պօղոսի դարձի տօնը 25 Յունուարին։
All the contents on this site are copyrighted ©. |