Viti 1975. Vdes papritur në Romë, në banesën e tij, më 15 janar, njeriu i madh i letrave shqipe, Ernest Koliqi. Varroset më 18 janar, në Prima Porta. Në ceremoninë funebre marrin pjesë shumë personalitete, kolegë, miq shqiptarë dhe italianë, shumë arbëreshë e shumë të tjerë, ardhur nga SHBA-të, Turqia, Suedia, Gjermania Perëndimore, Franca, Belgjika e nga vende të tjera të vetë Italisë. Lamtumirë solemne dhe e ndjerë për njeriun, i cili, për vite me radhë, ishte konsideruar personaliteti më i lartë i shqiptarëve të dalë nga kufijtë e atdheut mëmë.
Me të, vdes një pikë referimi për shqiptarët e lirë, të cilëve u lë trashëgim ëndrrën
e lirisë për tokën e vet, që do të realizohej shumë më vonë. Në testamentin e tij
moral, i pati kërkuar së bijës, Elizabetës, të shkelë në atdhe, sapo ai të çlirohej
nga shtypësi (komunizmi). E ajo e mbajti fjalën e në vitin 1992, pas rënies së regjimit
diktatorial, vuri këmbën në Shqipërinë e dashur, duke shënuar me këtë gjest, kthimin
simbolik të të atit, Ernest Koliqit, në shtëpi. Po e kujtojmë sot, Ernest Koliqin,
me tri shkrime, marrë nga rubrika “Xixat e Shêjzave” e revistës “Shêjzat”, që ai vetë
e botonte në Romë. Flasin për rëndësinë e traditës:
"Art pompier"
...Kush lakmon përtrîmje tue u shkëput nga tradita, ai verbsisht pregatitet me marrë
traditën e të huejit...
Lexoi me kureshtje ndër fletore e të përkohëshme letrare vjerrsha auktorësh të rij
shqiptarë. Flas për ata qi vjerrshojnë në Shqipní mbrendë. Thotë Fishta burrnisht,
tue çmue trimnín e Malazezvet: Kijau inád, por foljua hakun... Edhe unë, nonse larg
tyne për shkak të përftimit qi deshtas a padeshtas u a frymzon veprën, pohoj çiltërsisht
se në disá sijsh shfaqet nji talent i rrallë. Por ... dishka u a pret hovin. Besoj
mungesa e lirís e cila i detyron m’u strehue në gjinin e ermetizmit. Në nji gjuhë
të njomë, për sa i përket përdorimit letrar si âsht shqipja, gjuhë e pakristalizueme
mirë në leksik, ermetizmi të çon domosdo në greminë të shprehjeve pa kuptim. Tjetër
vlerë merr poezija e nji Éluard-i ase e nji Pasternakut, qi lirohen nga urat e logjikës
dhe i u shmangen lidhjeve syntaktike për me arrijtë n’esencjalitet , d.m.th. në poezín
e stërkulluet. Tjetër shkallë kanë vjerrshat e ku grumbullimi i fjalve kumbon pa mujtë,
nepër ato fjalë, me mishnue ndiesín qi i dridhet poetit në shpírt. Por, ndoshta, sikur
t’a shprehshin at ndiesí lakuriq nëpër teknikën tradicjonale, vjerrsha e tyne nuk
do të botohej...
Sidoqoftë, shumica e vjerrshatarëve të rij nuk m’a shuen etin e poezís qi tash mâ
se pesëdhetë vjet m’a shkrumbon shpirtin e më shtyn me kërkue kroje Zânash kangatare
në letrësít qi njof. Ata biejnë kulihum në të mbetat qi i a mveshin poetënve të vjetër.
E dijmë qi shija ndrron. Çdo vepër lypë trajta të reja shprehjeje artistike. Rreth
vjetve 1930 në letrësín shqipe ngjau nji kthesë. Si pionjer, qi nisi shkollën e ndjekun
edhe sot nga vjerrshatarët e Shqipnís, paraqitet Migjeni. Ky solli në poezín e vendit
t’onë tematikën e re, plot ngashërim përparimesh shoqnore, qi në Jugoslaví, ku ai
u arsimue, njifej me kohë. Nji qellim kategorik i letrarve qi, mutatis mutandis, ende
shkërbejnë Migjenin âsht ostracizmi i retorikës. E nuk kujtohen se biejnë në nji lloj
retorike edhe mâ të shterpë se ajo qi ata urrejnë n’auktorët e vjetër. Biejnë si viktima
në retorikën e antiretorikës. Shum nënshkrime të reja shifen sot në fund të hartimeve
lyrike botue në "Dritën" e në "Nëndorin". Tue përjashtue disa të pakët, e shumta e
vjerrshave s’kanë dallim njâna prej tjetrës. Shumicës i mungon personaliteti: mungon
në poezí të tyne ai tingull i veçantë, ajo fuqí tërhjekëse, ajo lëvizje flatrash ndër
parafytyrime qi i dhuron shpirtit nji dridhje të papritun e nji andje depërtuese.
Vjerrshatarët maten, paleh kush po e kalon shokun, në litanít trumbetuese të merzitshme
në lavd të rendimeve shtetnore publicitare. N’i lypsh të shkathët me trillue riçeta
agjografike të regjimit, të shkathët i ké, por n’i lypsh të zotët me të rrëmbye në
nji hov muzikuer e në nji shkelqim kromatik parafytyrimesh, në nji epërsí përftimesh
të nalta njerzore, deshiri i yt të jet i paplotsuem. Në Francë at lloj shprehjesh
të stereotipueme në pikturë, në muzikë, në letrësí e thrrasin "Art pompier".
Kûji i traditës
Nuk e mohojmë qi flàmuri i veprimtarís s’onë kulturore âsht tradicjonalizmi. Mbas
atij flàmur na marrshojmë. Vetë êmni i kësaj së përkohëshme e dishmon: Shêjzat, nji
hyllsí qi u a tregon udhat e detit lundertuesavet. N’at hyllsí shkelqejnë xhevahiret
e trashigimit t’onë stërgjyshuer. E dijmë se në disa t’ashtuquejtun përparimtarë,
të rij ndoshta në moshë por të mplakun në shpírt, këto pohime t’ona shkaktojnë nji
buzëqeshje përbuzëse. Na njehin të vjetruem, të kapërcyem, dinozaura teprue nga lashtësít
parahistorike. Nuk marrin ndër parasysh se na, të mbrapambetunit, u shkolluem e u
rritem e banojmë ndër metropole e se prandej, sado të plogët ndër trû me qênë, prap
fryma e vrullshëme përparimtare, mbrenda së cilës kalojmë jetën, na shtërngon t’i
prekim me dorë problemet qi ata mendojnë se na nuk i njofim. Na e përfillim në të
gjitha përmasat e veta përparimin në çdo degë të ditunís e të jetës: tradicjonalizmin
e kemi zgjedhë me vetëdijen mâ të plotë. Jemi të bindun se po deshtëm me rrnue në
botë si Shqiptarë, - duhet të vêm në themel të bashkëjetesës s’onë kombtare traditën.
Merret vesht traditën e kuptueme dinamikisht, të rrahun në frymë të kohës, të pastrueme
nga ndryshku i paragjikimeve qi s’kanë të bâjnë me palcin e thjeshtë të brumit t’onë
fisnuer. Duem qi breznít e ardhëshme t’a endin jetën e tyne me elementat mâ bujarë
të përvojës s’Etënvet të lashtë. Kush lakmon përtrîmje tue u shkëput nga tradita,
ai verbsisht pregatitet me marrë traditën e të huejit, tue kujtue se shkeli lum e
lum si njerí i ri mbi prak t’ardhëmënís. Njeri i rí ndoshta po, por jo Shqiptar.
Nji anmik në ditë
Tue bisedue para shum kohe me nji të dashun t’êmin, Shqiptar mendesquet e i rysun
nëpër ngjarje të ndërlikueme të historís shqiptare, ra fjala mbi grindjet qi e shuejnë
ndër né përpjekjen në daç politike në daç shoqnore e letrare. E më tregoi se nji herë
në Tiranë Hasan Prishtina, Atdhetari i njoftun kosovar, ishte qênë sulmue keqas nga
nji gazetar me nji artikull plot kritika t’ashpra. Hasan begu kishte do djelm si petrita
mbas vetes. Njâni prej tyne, si mori vesht sulmin e pësuem nga zotnija i vet, i tha:
- "Beg, m’ep lêjen të shkoj e t’i ap nji drû të shëndoshtë atij edepsyzit qi na ka
dokanisë aqë randë... ". Atdhetari i Prishtinës i u përgjegj: - "Morè budallë, atij
duhet t’i jemi mirnjohës. Deri sa bota më shajnë ndër gazeta e kafehaneve don me thânë
se dishka vlej. Atëherë kur mos të flasin mâ kush për tê, nji njerí politiket ka mbarue...
".
Lazër Shantoja thonte: - "Për m’u bâ njerí i madh në Shqipní, duhet me fitue s’paku
nji anmik në ditë. Gjindja kur ndigjojnë se dikush shahet pajadá e me ngulm, fillojnë
e brehen nga kureshtja m’e njoftë, me dijtë pse përmendet e pse urrehet me aqë furí.
Fitò nji anmik në ditë dhe syt e botës kanë m’u sjellun kah ti...".
ERNEST KOLIQI, "Shêjzat", 1973, n. 5-8.
All the contents on this site are copyrighted ©. |