Լիբանան - Զմմառու վանքի մայր տաճարին մէջ Սուրբ Ծննդեան պատարագ։

Երկուշաբթի 25 Դեկտեմբեր 2017-ին, առաւօտեան ժամը 10:30-ին, Զմմառու վանքի մայր տաճարին մէջ, մեր Տիրոջ Յիսուսի Քրիստոսի Ս. Ծնունդը տօնուեցաւ: Սուրբ և Անմահ Պատարագ մատոյց Զմմառու Պատրիարքական Կղերի Միաբանութեան Փոխանորդ և վանքի Մեծաւոր՝ Գերպծ. Հ. Գաբրիէլ Թ. Ծ. Վրդ. Մուրատեան: Պատարագին ներկայ գտնուեցան Վարչական Հայրեր, Առաքինազարդ Քոյրեր, ժառանգաւորներ և հաւատացեալներ:

Գերապայծառ Հայրը իր քարոզին մէջ անդրադառնալով Քրիստոսի Ծննդեան խորհուրդին, ըսաւ. «2018 տարի եղաւ որ կը տօնենք Քրիստոսի ծննդեան տօնը: Ան աշխարհակալ մը չէր, կայսր մը չէր, այլ խոնարհ մանուկ մը, որ ծնաւ մսուրի մը մէջ և կ'ապրի մեր սրտերուն մէջ: Այսօր մեծ աւետում է բոլոր աշխարհին, քանի Քրիստոսի ծնունդով վերջ դրուեցաւ սատանայի իշխանութեան: Այսօր աշխարհը պէտք ունի նոր աւետրանումներու և մենք ենք այդ առաքեալները: Սիրել, օգնել, խոնարհ ըլլալ և ծառայել. Որքա՜ն աշխարհը պէտք ունի իսկական փրկիչներու: Քրիստոս որ ծնունդ առաւ մսուրի մէջ, պէտք է ծնի մեր սրտերուն մէջ: Մսուրը բաց է, խորանին վրայ, տապանակին մէջ և միշտ ընդունելու պատրաստ է մեր կեանքի խորհուրդը: Այսօր իմ միտքը կ'երթայ հիւանդներուն, աղքատներուն, ծերերուն և մանուկներուն: Զմմառու Տիրամայրը թող գուրգուրայ մեր բոլորին վրայ, ինչպէս գուրգուրաց Յիսուս Մանուկին: Թող օրհնուին մեր տուները, մեր գործերը, մեր ընտանիքներն ու հարազատները»:

Ս. Պատարագի աւարտին՝ Պատրիարքական Փոխանորդը, հոգեւոր դասն ու ներկաները թափօրով ուղղուեցան դէպի Մայրավանքի դահլիճ, ուր յաւուր պատշաճի հիւրասիրութիւն տեղի ունեցաւ և փոխադարձ մաղթանքներ կատարուեցան, ըսելով. «Քրիստոս ծնաւ և յայտնեցաւ, ձեզի մեզի մեծ Աւետիս»:

 

 

Հալէպի Հայ Կաթողիկէ Ս. Խաչ Եկեղեցւոյ մէջ տեղի ունեցաւ Ս. Ծնունդի Ս. Պատարագ

Երկուշաբթի, 25 դեկտեմբեր 2017-ին, Հալէպի Հայ Կաթողիկէ Ս. Խաչ եկեղեցւոյ մէջ, հանդիսաւոր կերպով նշուեցաւ Կաթողիկէ Ս. Ծննդեան տօնը: Հայ Կաթողիկէ Առաջնորդ Արհի. Տ. Պետրոս Արք. Միրիաթեան հոգեւոր հայրերու ընկերակցութեամբ մատուցեց հանդիսաւոր Ս. Պատարագ, եւ օրուան խորհուրդի մասին հոգեպարար քարոզ տուաւ: Արհի. Տ. Պետրոս Արք. Միրիաթեան Ս. Պատարագի աւարտին ընդունեց Հալէպի պետական աւագանին եւ այլ հիւրեր:  Այս մասին կը յայտնէ Բերիոյ նիուզը: