Ուաշինկթըն վեթոյի կ ՛ենթարկէ Երուսաղէմի վերաբերեալ բանաձեւը
Միացեալ Նահանգներ իրենց վեթոյի իրաւունքը կիրարկեցին Երուսաղէմի վերաբերեալ ՄԱԿ-ի Ապահովութեան խորհուրդին ներկայացուած եգիպտական բանաձեւին դէմ: 14 երկիրներ բանաձեւին թեր քուէարկեցին:
ՄԱԿ-ի մօտ Միացեալ Նահանգներու մնայուն ներկայացուցիչ Նիքի Հէյլի մերժեց այն ամբաստանութիւնները, թէ Ուաշինկթըն կը հեռանայ Միջին Արեւելքի մէջ խաղաղութեան հոլովոյթէն` նշելով. «Պաղեստինցի ղեկավարներուն յայտարարութիւնները իրենց չեն նպաստեր, եւ Ուաշինկթըն շատ բան տուաւ պաղեստինցի ժողովուրդին»:
Ըստ անոր, ՄԱԿ-ը անգամ մը եւս անիրաւ կերպով կը վարուի Իսրայէլի հետ:
Պաղեստինեան իշխանութիւնը անմիջապէս դատապարտեց ամերիկեան վեթոն եւ զայն նկատեց միջազգային ընտանիքին նկատմամբ «անտեսում մը»:
Քուէարկութեան արդիւնքին լոյսին տակ` Իսրայէլի վարչապետ Պենիամին Նեթանիահու շնորհակալութիւն յայտնեց Միացեալ Նահանգներու դեսպանին` աւելցնելով. «Ճշմարտութիւնը յաղթեց սուտին»:
Պաղեստինեան իշխանութեան նախագահ Մահմուտ Ապպաս շեշտեց, որ «այսօրուընէ սկսեալ կը մերժենք, որ Միացեալ Նահանգներ խաղաղութեան հոլովոյթին մէջ միջնորդ ըլլան»` նշելով. «Վճռած ենք ՄԱԿ-ի լիարժէք անդամակցութիւն ստանալ»:
«Այսօր պիտի հրապարակենք Միացեալ Նահանգներու նախագահ Տանըլտ Թրամփի որոշումին դէմ 22 միջազգային նոր կազմակերպութիւններու անդամակցութեան դիմումներու ստորագրութիւնը», ըսաւ ան` ընդգծելով. «Երուսաղէմի վերաբերեալ Թրամփի յայտարարութիւնը կատարելապէս զուրկ է օրինականութենէ, եւ անոր դէմ պիտի որդեգրենք իրաւական, քաղաքական եւ դիւանագիտական միջոցառումներ»:
| All the contents on this site are copyrighted ©. |