Սուրբ Աթոռը կը մնայ մօտ՝ Աւստրալիոյ Կաթողիկէ Եկեղեցւոյ, մինչ մտիկ կʼընէ զոհերուն»

(Ռատիօ Վատիկան) Աւստրալիոյ մէջ հրապարակուած է մանկապղծութեան քննարկումի յանձնաժողովի տեղեկատուութիւնը, որ արդիւնքն է հինգ տարիներու աշխատանքի։

Վարչապետ Մալքոմ Թըրնպուլ, անդրադառնալով տեղեկատուութեան, մանկապղծութիւնը նկատած է Աւստրալիոյ «ազգային ողբերգութիւն»։ Ան յայտարարած է, թէ ընդառաջելով յիշեալ յանձնախումբի առաջարկին, կեանքի պիտի կոչէ նպատակային խումբ մը, որ քննարկէ յիշեալ խնդիրը, եւ դրուատած է զոհերու եւ անոնց ծնողներուն քաջութիւնը՝ խուզարկումներու ընթացքին ցուցաբերած համագործակցութեան մէջ։ Մեծ է զոհերու թիւը, իսկ մեղադրուող հաստատութիւններու թիւը կը հասնի չորս հազարի, որոնց կարգին նաեւ շատ մը կաթողիկէ հաստատութիւններ։ Կաթողիկէ քահանաներու եօթ տոկոսը մեղադրուած են 1950-2010 թուականներու միջեւ կատարուած մանկապղծութեան ոճիրով։ Այս պատճառով, առաջարկ ներկայացուած է պարտադրել քահանաները, որ խզեն խոստովանանքի խորհուրդի գաղտնիքը՝ յայտնաբերելու համար մանկապիղծները։ Յանձնաժողովը նոյնպէս առաջարկած է վերատեսել քահանաներու կուսակրօնութեան հարցը։

Անդրադառնալով Royal Commission into Institutional Responses to Child Sex Abuse in Australia յանձնաժողովի տեղեկատուութեան, Սուրբ Աթոռի մամլոյ գրասենեակը հրապարակած է յայտարարութիւն մը, նկատելով, որ յանձնաժողովի աշխատանքներուն արդիւնքը արժանի է խորաթափանց քննարկումի։ «Սուրբ Աթոռը կը մնայ մօտ՝ Աւստրալիոյ Կաթողիկէ Եկեղեցւոյ – աշխարհական հաւատացեալներուն, կրօնաւորներուն եւ կղերականներուն – մինչ մտիկ կʼընէ զոհերուն եւ վերապրողներուն եւ կʼընկերակցի անոնց՝ բուժումի եւ արդարութեան հասնելու ջանքերուն մէջ» գրուած է վերոնշեալ յայտարարութեան մէջ ու ապա նշուած է թէ «Ֆրանչիսկոս Սրբազան Պապը, Անչափահասներու Պաշտպանութեան Քահանայապետական Խորհուրդի հետ ունեցած վերջին հանդիպումին առիթով հաստատած էր, թէ Եկեղեցին կոչուած է ըլլալ կարեկցանքի վայր մը, մասնաւորապէս անոնց համար, որոնք տառապած են, եւ շեշտած էր թէ Եկեղեցին պարտականութիւնն ունի ապահովելու միջավայրեր՝ որոնք կʼերաշխաւորեն բոլոր մանուկներու եւ խոցելի չափահասներու պաշտպանութիւնը։»