Në ciklin tonë kushtuar dhjetë këshillave të Papës Françesku për të rinjtë, emisioni
i sotëm i kushtohet Fjalës që Ati i Shenjtë mbajti në Ditën e 28-të Botërore të Rinisë,
më 27 korrik 2013. Në atë rast, i nxiti të rinjtë të stërviten për të jetuar si Jezusi.
“Jezusi
– thotë Papa – na jep mundësinë për të fituar diçka sipërore, më të madhe edhe se
Kupa e Botës në futboll! Jezusi na jep mundësinë për një jetë të lumtur e për një
të ardhme me Të, që nuk do të ketë fund, në jetën e amshuar. Këtë na ofron Krishti.
Por, na kërkon edhe ta paguajmë biletën e hyrjes e, kjo hyrje kalohet kur ne stërvitemi
për ‘të qenë në formë’, për të përballuar pa frikë të gjitha situatat e jetës, duke
dëshmuar fenë.
Secili
të përgjigjet për vete – u kërkon Françesku të rinjve. – A flas unë me Jezusin apo
kam frikë nga heshtja? A e lë Shpirtin Shenjt t’i flasë zemrës? A i kërkoj Jezusit:
çfarë dëshiron që të bëj, çfarë do nga jeta ime? Kjo do të thotë ‘të stërvitemi’.
Pyeteni Krishtin, flisni me Jezusin. Mos kini frikë prej Tij! Kjo është lutja. E me
të, stërviteni në dialogun me Jezusin: përmes sakramenteve, që e shtojnë praninë e
Tij në zemrën tonë; përmes dashurisë vëllazërore: të dini të dëgjoni, të kuptoni,
të falni, të mirëprisni, të ndihmoni të tjerët, çdo njeri, pa përjashtim, pa e mënjanuar.
Të dashur të rinj – përfundon Papa – të jeni ‘atletë të vërtetë të Krishtit’!”