Vijon shtegtimi i Papës: sot, në Mianmar, nesër, në Bangladesh

Vijon shtegtimi i Papës: sot, në Mianmar, nesër, në Bangladesh. “Harmoni e Paqe”. Qëllimi i etapës së parë të shtegtimit të Papës në Mianmar, u pasqyrua në të gjitha takimet dhe kremtimet. Sidomos, në takimin me viset e njerëzit e këtyre periferive, të cilat i vë gjithnjë në plan të parë.

Sot, 29, përsëri në Jangon, Françesku kremtoi Meshën në një hipodrom të lashtë kolonial, tani supermerkat sportiv, për të hyrë, pastaj, në atmosferën e Kaba Aye paya, “Pagodës së paqes botërore”, ku po takohet me Këshillin e lartë “Sangha” të 47 murgjërve budistë, kryesuar nga doktor Bhaddanta Kunarabhivamsa e, më pas, takimi me ipeshkvijtë birmanë. Nesër, e enjte, 30,  një kremtim tjetër eukaristik në St Mary’s Catthedral të Jangonit me protagonistë, të rinjtë  birmanë.

Shumë i rëndësishëm, në Mianmar, takimi me budistët. Në Bangladesh, ai ndërfetar. Është rikthim në temën e marrëdhënieve paqësore ndërmjet feve. E duhet nënvizuar edhe se, në të dy vendet, Papa e përfundon vizitën duke u takuar me të rinjtë. Për t’u kujtuar të gjithëve se edhe nga bashkësitë e vogla katolike, mund të lindin shpresa të mëdha!

Etapa e Bangladeshit

Nesër, pas Meshës në St Mary’s Catthedral të Jangonit, dy orë e gjysëm fluturim drejt perëndimit, për të arritur në Bangladesh në orën 15 me atë lokale.  Etapa e dytë do të hapet menjëherë me takimet protokollare në kryeqytetin Dhaka. Pas homazheve në Memorialin e Martirëve të Atdheut dhe në Memorialin e themeluesit të Kombit, Françesku do të takohet privatisht, sipas skemës së zakonshme, me presidentin Abdul Hamid, për të marrë, më pas, fjalën në takimin me autoritetet politike, civile e diplomatike të vendit. Ditën e mëpasme, 1 dhjetor, Papa do të kryesojë Meshën, me shugurimin e 16 meshtarëve, do të presë për vizitë, në nunciaturë, kryeministrin bengalez, për ta përfunduar ditën në takim me ipeshkvijtë vendas e mijëra njerëz, që priten në takimin  ndërfetar dhe ekumenik për paqen. Dita e fundit, 2 dhjetor, do të hapet me një nga takimet më të pritura: vizitën që do t’u bëjë Françesku të sëmurëve të “Shtëpisë Nënë Tereza”, në Tejgaon, për të vijuar me përqafimin e rregulltareve e rregulltarëve të Bangladeshit. Takimi i fundit, ai me të rinjtë. Edhe këtu, si në Mianmar, hapësira e fundit e dëshiruar nga Papa do të jetë për ata, që do të kenë mundësi t’i japin limfë të re asaj “paqeje” e cila, prej ditësh shpaloset mbi zemrën e pëllumit!

Gjatë takimit ndërfetar dhe ekumenik për paqen, në program për 1 dhjetorin e ardhshëm, në Dhaka të Bangladeshit, do të jetë i pranishëm edhe një grup refugjatësh rohingya.

Para se të kremtojë Meshën Shenjte në Dhaka, disa fëmijë rrugësh do t’i dhurojnë Papës një palë sandale, realizuar me duart e tyre. Në të dy vendet aziatike, Papa Françesku do të udhëtojë me një makinë të mbyllur, jo të blinduar. Në Mianmar, u strehua në kryeipeshkvi, ndërsa në Bangladesh, në selinë e nunciaturës.

Në të dy vendet, ky është shtegtim drejt periferive. Papa Françesku flet shumë për periferitë, e kjo është vërtet periferi: si për distancën, e ashtu edhe për bashkësinë katolike shumë të vogël. E në të dy vendet, Papa dëshiron të dëshmojë përsëri, vlerën e fesë për paqen e pajtimin, pa harruar kurrë përforcimin në fe të bashkësisë katolike të këtyre dy vendeve, pakicë, por jo pa rëndësi në indin, si të Bangladeshit, ashtu edhe të Mianmarit…