Ոչ եւս է Մարսիլիոյ թեմի երբեմնի արքեպիսկոպոսը կարդինալ Պերնարտ Փանաֆիու
(Ռատիօ Վատիկան) Մարսիլիոյ թեմի երբեմնի արքեպիսկոպոս կարդինալ Պերնարտ Փանաֆիուի մահուան ի լուր, երկուշաբթի, 13 նոյեմբեր 2017-ին, Վատիկանի Պետական քարտուղար՝ լարդինալ Փիեթրօ Փարոլին, յանուն Ֆրանչիսկոս Սրբազան Քահանայպետին ցաւակցագիր յղեց Մարսիլիոյ թեմի Արքեպիսկոպոս՝ գերապայծառ ԺորԺ Փոնթիէյի։
Ցաւակցագիրին մէջ ծիրանաւորը Ֆրանչիսկոս Պապին ցաւակցութիւնները յայտնած է թեմի արքեպիսկոպոսին, հանգուցեալի հարազատներուն, թեմի հաւատացեալներուն, ինչպէս նաեւ «Նոթր Տամ» հասարակութեան ։
«Ֆրանչիսկոս Պապ բարեգութ Աստուծմէ հայցած է, որ Իր խաղաղութեան եւ լոյսին մէջ ընդունի իմաստուն հովիւը, որ Աստուծոյ բարութիւնն ու սէրը ցուցաբերած է ժողովուրդին, նախ որպէս տեղակալ եպիսկոպոս ապա որպէս թեմի արքեպիսկոպոս», գրած է կարդինալ Փարոլինը ու բարձր արժեւորած է ննջեցեալ կարդինալին Մարսէյ քաղաքի մէջ զանազան կրօններու եւ մշակոյթներու միջեւ երկխօսութիւն հաստատելու ջանքերը, ու խաղաղ համակեցութեան սատարը։
Ցաւակցագիրի աւարտին կարդինալ Փարոլին Ֆրանչիսկոս Պապին առաքելական օրհնութիւնները փոխանցած է նախ վախճանեալ կարդինալի հարազատներուն, ապա թեմի հաւատացեալներուն, ինչպէս նաեւ բոլոր անոնց, որոնք պիտի մասնակցին հանգուցեալ կարդինալին յուղարկաւորութեան արարողութեան ։
| All the contents on this site are copyrighted ©. |