BE-liderët fetarë për Evropën e bazuar mbi vlerat

Të martën e kaluar, Frans Timmermans, zëvendës-president i parë i Komisionit evropian organizoi, në praninë e zëvendës-presidentes së Parlamentit evropian,  Mairead McGuinness, një takim të  nivelit të lartë  me liderët fetarë ardhur nga mbarë Evropa. Ky takim vjetor, i 13-ti i nivelit të lartë, u zhvillua në kuadrin e diskutimit në vijim, për ardhmërinë e Evropës, nisur nga presidenti Juncker me librin e bardhë  të Komisionit, më 1 mars.

Zëvendës-presidenti i parë, Frans Timmermans,  deklaroi: “Ardhmëria e Evropës është në duart e qytetarëve të saj. Të gjithë kemi përgjegjësi për t’i dhënë trajtë kësaj ardhmërie, duke u udhëhequr nga vlerat tona të përbashkëta. Dialogu i rregullt me organizatat konfesionale, ashtu si dialogu me organizatat jo konfesionale, na krijon kushtet ta përballojmë çështjen e ardhmërisë sonë të përbashkët nga këndvështrime të ndryshme. Vetëm përmes një dialogu, që i përfshin të gjithë, mund të përcaktojmë rrugën më të mirë që duhet ndjekur, për t’i dhënë formë ardhmërisë.  

Ky takim i nivelit të lartë, pjesë e dialogut të rregullt me Kishat, bashkësitë fetare dhe organizatat filozofike e jo konfesionale, i parashikuar nga neni 17 i Traktatit të Lisbonës, ishte rast për t’i diskutuar në mënyrë të thelluar  çështjet, që kanë të bëjnë me temat e vlerave e të qeverisjes. Diskutimi,  në vijim, mbi ardhmërinë e Evropës, synon ta bëjë Kontinentin e vjetër  më të bashkuar, më të fortë, më demokratik.

Në takim - siç njoftuan pjesëmarrësit në një konferencë shtypi – u diskutua për të ardhmen e projektit evropian, vlerat, identitetin, respektimin e larmive, kontributin e bashkësisë së besimtarëve në shtetin e së drejtës  e në drejtësinë shoqërore. Por u fol edhe mbi Brexit, Poloninë, të rinjtë në Evropë, punën, dialogun ndërmjet feve e edhe për problemin e tolerancës fetare. Të shumtë, liderët fetarë: imzot Jean-Claude Hollerich, kryeipeshkëv i Luksemburgut; metropoliti Emmanuel i Francës, zëvendës-kryetar i Konferencës së Kishave evropiane, përfaqësues i Patriarkatit ekumenik të Kostantinopojës; imami Seyran Ates, i xhamisë Ibn Rushd-Goethe të Berlinit; metropoliti Cleopas i Suedisë dhe i gjithë Skandinavisë, i patriarkanës ekumenike të Kostandinopojës; Massimo De Feo, president i Zonës Europa të Kishës së Jezu Krishtit të shenjtorëve të ditëve të fundit; Ron Eichhron, president i Bashkimit budist evropian; Albert Guigui, kryerabin i Brukselit; imam Tareq Oubrou, hoxha i madh i Bordeaux; Irmgard Schwaetzer, president i Sinodit të Kishës Ungjillore  të Gjermanisë; imzot Noel Treanor, ipeshkëv katolik i Down e Connor; kryeipeshkvi Urmas Viilma, i Kishës ungjillore luterane të  Estonisë.

Ky takim vjetor ishte i 13-ti i nivelit të lartë, organizuar nga Komisioni. Dialogu me kishat, bashkësitë fetare dhe organizatat filozofike e jo konfesionale u sanksionua nga Traktati i Lisbonës (neni 17 i Tfue) duke nisur nga viti 2009. Dialogu zhvillohet nën përgjegjësinë e zëvendës-presidentit të parë Timmermans. Më 19 qershor 2017 Komisioni  organizoi takimin e tij vjetor me organizatat jo konfesionale mbi të njëjtën temë “Ardhmëria e Evropës”.

Në marsin e kaluar, kur paraqiti Librin e bardhë, që niste reflektimin mbi të ardhmën e Evropës, Komisioni u angazhua të organizojë dialogë për të nxitur diskutimin mbi perspektivat e Evropës në vitin 2025. Në fjalimin e tij mbi gjendjen e Bashkimit më 2017, Presidenti Junker e paraqiti në mënyrë më të hollësishme vizionin e tij për të ardhmen e Evropës, duke nënvizuar se Evropa është sidomos Bashkim vlerash. Presidenti Juncker  propozoi edhe një tabelë marshimi për një Evropë më të bashkuar, më të fortë, më demokratike.