Amshimi e mban zemrën pezull…
(Meditim)
Kur shuhet drita në sy
e dielli thërmohet ngadalë
ndër rremat e selvive,
njeriu lëngon për vdekje…
pse në shpirt i v’lon der’ në fund
dëshira e përjetës.
Zemra milionash rrahin
në kërkim të një Emri
para se të shuhen.
Të gjallët rrëzë kryqash,
përulen deri në tokë
me sy të përlotur.
Koha kalon si ëndërr
e kalendari shënon
një ditë pa të nesërme.
Kur pika e fundme e dyllit
pikon mbi rrasë, në terr.
njeriu zgjohet në ditën e kthimit
te Ati.
Amshimi e mban zemrën pezull,
jo nata e varrit!
E shpirti e josh njeriun
krejt i kulluar të kthehet
nga pati ardhur.
Atje, ku zërat e botës
më nuk ushtojnë
e rruga dahet më dysh:
gjysma është vdekje, pa zgjim,
e gjysma tjetër - amshim!
All the contents on this site are copyrighted ©. |