Եգիպտոսի խորհրդարանը վաւերացուց երկրին մէջ երեք ամսուան տեւողութեամբ արտակարգ դրութիւն հաստատելու որոշումը:
Եգիպտացի օրէնսդիրները զօրակցեցան Եգիպտոսի նախագահ Ապտել Ֆաթթահ Սիսիի` երկրին մէջ արտակարգ դրութիւն յայտարարելու որոշումին, մինչ երկիրը կը դիմագրաւէ Սինա թերակղզիին մէջ գտնուող ՏԱՀԵՇ-ի զինեալներուն վտանգը:
Եգիպտական սահմանադրութիւնը նախագահին կ՛արտօնէ նախարարաց խորհուրդին համամտութեամբ յայտարարել արտակարգ դրութիւն մը, որուն տեւողութիւնը առաւելագոյնը երեք ամիս է եւ երկարաձգելի է միայն մէկ անգամով` երկու պարագաներուն ալ խորհրդարանի հաւանութեամբ:
Նախապէս Եգիպտոս արտակարգ դրութիւն յայտարարած էր ապրիլ 2017-ին Թանթա եւ Աղեքսանտրիա քաղաքներուն մէջ երկու եկեղեցիներու դէմ կատարուած յարձակումներէն ետք, որոնք պատճառած էին 45 զոհեր եւ տասնեակներով վիրաւորներ:
ՏԱՀԵՇ ստանձնած էր յարձակումներուն պատասխանատուութիւնը:
All the contents on this site are copyrighted ©. |