Papa: shqetëson ikja e të krishterëve të Lindjes nga tokat e tyre

100 vjet më parë, në vitin 1917, Papa Benedikti XV themelonte Kongregatën për Kishat Lindore dhe Institutin Papnor Lindor. Papa Françesku kremtoi sot paradite meshën e përkujtimit të kësaj ngjarjeje të rëndësishme, në Bazilikën romake të Zojës së Madhe. Nëse atëherë “tërbohej Lufta I Botërore”, sot, nënvizoi Papa në homeli, përjetojmë “një tjetër luftë botërore, megjithëse pjesë-pjesë”.

“E shohim shumë vëllezër e motra të krishtera të Kishave Lindore të provojnë persekutime dramatike e një diasporë gjithnjë e më shqetësuese”.

Kjo na bën t’i bëjmë pyetje Zotit, t’i kërkojmë arsyen për ekzistencën e shumë të këqiave, vërejti Ati i Shenjtë:

“Shohim njerëzit e këqinj, që pa skrupuj ndjekin interesat e tyre, i shtypin të tjerët e, duket se atyre gjërat u shkojnë mirë: fitojnë atë që duan dhe mendojnë vetëm si ta gëzojnë jetën”.

Këto pyetje janë bërë jetë e mot, vuri në dukje Papa Françesku, sepse i gjejmë edhe në Shkrimin Shenjt. E përgjigjja është në vetë Fjalën e Zotit, që mban një libër kujtimesh “për ata, që kanë frikën e Tënzot dhe e nderojnë emrin e Hyjit”.

“Zoti – theksoi Ati i Shenjtë – nuk i harron bijtë e vet, kujtesa e vet është për të drejtët, për ata që vuajnë, që shtypen, që kërkojnë ‘pse’-të e, megjithatë, nuk reshtin së besuari në Zotin”.

Ka një mënyrë për t’i kujtuar Hyjit se kemi nevojë për Të. E kjo është lutja:

“Kur lutemi, kemi nevojë për guximin e fesë: duhet të besojmë se Zoti na dëgjon, të kemi guximin të trokasim në portën e Tij”.

Vetë Zoti na thotë se kushdo kërkon, do të gjejë e, kushdo troket, do t’i hapet dera:

“Por pyes: a është vërtet kështu, lutja jonë? A na përfshin vërtet, a e prek zemrën dhe jetën tonë? A dimë si të trokasim në zemrën e Hyjit?”

Përgjigjja e Atit Qiellor do t’i kapërcejë aspiratat tona, theksoi Papa Françesku:

“Njeriu troket me lutjen e tij në portën e Zotit për të kërkuar hire. E Ai, që është Atë, më jep diçka më tepër: më jep dhuratë Shpirtin Shenjt”.

Pra, përfundoi Papa Françesku: “të mësojmë si të trokasim në zemrën e Zotit! E ta bëjmë këtë me guxim”.