«Միջազգային ներում»-ի գործիչներ Թուրքիոյ մէջ կրնան դատապարտուիլ 15 տարուան բանտարկութեան
Թուրքիոյ դատախազութիւնը կը պահանջէ «Միջազգային ներում» իրաւապաշտպան կազմակերպութեան
թրքական ներկայացուցչութեան գործիչները դատապարտել 15 տարուան բանտարկութեան: Այս մասին
երէկ հաղորդեց թրքական «Տողան» լրատու գործակալութիւնը:
Ահաբեկչական կազմակերպութեան անդամակցութեան մեղադրանք ներկայացուած է 11 իրաւապաշտպաններու,
որոնցմէ 8-ն կալանաւորուած են:
Յուլիսի կէսերուն թրքական դատարանը վճիռ արձակեց կալանաւորելու վեց իրաւապաշտպաններ,
ներառեալ` Թուրքիոյ ներկայացուցչութեան ղեկավարը: Անոնք բոլորն ալ կը կասկածուին ահաբեկչական
գործունէութեան մէջ:
Ներկայիս նոյնպիսի կասկածով Թուրքիոյ քննչական մեկուսարաններէն մէկուն մէջ կը գտնուի
գերմանական «Տի Վելթ» օրաթերթի լրագրող Տենիզ Եուճել: Ատիկա վերջին տարուան ընթացքին
Պերլինի եւ Անգարայի միջեւ յարաբերութիւններու վատթարացման գործօններէն մէկն է:
Անգարայի մէջ իրաւապաշտպաններու ձերբակալման հարցով Գերմանիոյ արտաքին գործոց նախարարութեան
արձագանգը կը նկատեն միջամտութիւն Թուրքիոյ դատական համակարգին:
| All the contents on this site are copyrighted ©. |