Քիւրտերը Սուրիոյ մէջ գրաւած Են քարիւղի հանք մը
Քրտական ղեկավարութեամբ Սուրիական ժողովրդավարական ուժերը գրաւած են Սուրիոյ Տէր Զօր նահանգի քարիւղի հանքը: Այս մասին կը հաղորդէ ռուսական «Քորրեսփոնտընթ» կայքը:
Քիւրտերը իրենց վերահսկողութեան տակ առած են Սուար եւ Քասրա քաղաքները: Քրտական ուժերը մասնաւորաբար վերահսկողութեան տակ առած են Տէր Զօրէն եւ Եփրատ գետէն 22 քիլոմեթր դէպի արեւելք գտնուող քարիւղի հանքը:
«Սուրիոյ մէջ քարիւղի 11 մեծ հանք կը գտնուի Եփրատի արեւելեան ափին, որ նահանգը կը բաժնէ երկու մասի: Քարիւղի այդ հանքերուն մէջ կեդրոնացած է Սուրիոյ բոլոր ուժանիւթային հարստութեանց շուրջ մէկ երրորդը», կ՛ըսուի աղբիւրին հաղորդագրութեան մէջ:
Կը հաղորդուի, որ սուրիական բանակը սեպտեմբերին անյաջող փորձեր կատարած է Եփրատի արեւելեան ափերուն քիւրտերուն յառաջխաղացքը կանխարգիլելու համար:
| All the contents on this site are copyrighted ©. |