Ֆրանչիսկոս Պապին հոգեւոր մօտիկութիւնը ''Հարվէյ'' Փոթորիկի թիրախ զոհերուն։

(Ռատիօ Վատիկան) Հինգշաբթի 31 օգոստոս 2017-ին Վատիկանի Պետական Քարտուղար Կարդինալ Փիեթրօ Փարոլին Ֆրնաչիսկոս Պապին անունով զօրակցական պատգամ մը յղեց Կարվըսթոն-Հիուսթոն թեմի առաջնորդ եւ Միացեալ Նահանգներու եպիսկոպոսական համահաւաք դասի նախագահ` Կարդինալ Տանիել Տի Նարտոյին որուն մէջ յայտնեց Քահանայապետին ''հոգեւոր մօտիկութիւնը'' բոլոր անոնց որոնք թիրախ դարձան այս օրերուն Միացեալ Նահանգները հարուածող Փոթորիկին։

Վատիկանի Պետքարտուղարը ապա նշեց թէ Քահանայապետը ''խորապէս ազդուած''  է  ''բնական այդ աղէտի'' պատճառած նիւթական աւերներուն եւ մարդկային կեանքի կորուստներուն ի տես։ Կարդինալ Փարոլին ապա վստահեցուցած է Սրբազան Քահանայապետին աղօթքները` ըլլայ զոհերուն, ըլլայ անոնց ընտանեկան պարագաներուն համար, ինչպէս նաեւ բոլոր անոնց որոնք փրկարարական եւ շտապ օգնութեան գործերով կը զբաղին, մաղթանք յայտնելով որ փոթորիկի թիրախ անհատներու եւ հասարակութիւններու շտապ պահանջները` փոխադարձ օգնութեան ու զօրակցութեան լայնածաւալ ալիք մը ներշնչեն։ Այս զգացումներով Սրբազան Քահանայապետը բոլորին կ՛ուղարկէ իր օրհնութիւնը որպէս խթան մխիթարութեան, ուժի ու Տիրոջ մէջ խաղաղութեան։