Islanda, fëmijëve Down u mohohet jeta: “Nuk është shoqëri më e mirë!

“Shikojnë vetëm sindromën Down, nuk më shikojnë mua”: mendon kështu një vajzë me trisomi 21, intervistuar nga Elaine Quijano, autore e studimit CBS (Columbia Broadcasting System), që përqendrohet tek rasti i Islandës ku, nga një popullsi prej 335 mijë banorësh, lindin çdo vit vetëm dy a tre fëmijë me sindromën Down.

Sukses i madh i shkencës, ky? Jo edhe aq! Më shumë se me shkencën, kjo statistikë ka të bëjë me ndërprerjet vullnetare të shtatzanisë që, pas përgjigjes pozitive të testit të paralindjes, kur rezultati është me trisomi 21, në Islandë arrijnë gati në 100%, 98% në Danimarkë, 90% në Mbretërinë e Bashkuar, 77% në Francë e 67% në SHBA, sipas të dhënave të studimit CBS.

Që nga fillimi i shekullit u krijua mundësia e një analize për diagnostikimin e trisomisë 21, me saktësi deri në 85%. Këtë analizë e bëjnë më se 80% e grave të Islandës, ku ligji e lejon ndërprerjen e shtatzanisë edhe pas javës së gjashtëmbëdhjetë, në rast anomalish të fetusit, ndërmjet të cilave, edhe sindroma Down. Antonella Falugiani, kryetare  e Coordown, mendon se ka shumë dizinformacion:

“Është e qartë se sindroma Down është sëmundje, që ndikon mbi vonesat e zhvillimit, por sot nuk mungojnë as perspektivat e, me rehabilitimin në moshtë njomë, mund të arrihen rezultatet e shpresuara, që u krijojnë fëmijëve ardhmërinë indipendente dhe autonominë më të madhe të mundshme. Pa harruar se janë njerëz, që japin shumë.

Ana Contardi, koordinatore e Shoqatës Italiane Persona Dawn (AIPD) dhe kryetare e Europan Down Sydrome Association (EDSA) para mikrofoneve tona, deklaron:

“Mendoj se fenomeni irlandez duhet parë me shumë vëmendje, por edhe duhet ridimensionuar. Kur flitet për numra të paktë, kjo ngulitet thellë në ndërgjegjen individuale. Unë mendoj se vijojmë t’i kushtojmë vëmendje temës së mundësisë të lindjes së fëmijës me sindromën Down  e jo temës, shumë më interesante, që është “Si të veprojmë, që njeriu me sindromën Down të mund të jetojë mirë”.

Për kryetaren e Coordown – nënë e një vajze me sindromën Down, prej 18 vjetësh shumë pranë njerëzve me trisomi 21 - një shoqëri pa njerëz me sindromën Down, nuk është më e shëndetshme, as më e evoluar, por shoqëri që humb shumë, në një mori aspektesh.

Vijon Falugiani: “Duhet të mësohemi ta vlerësojmë jetën e gjërat e vogla, për ta bërë këtë botë më njerëzore e më të mirë”.

Sindroma Down njihet mirë në Shqipëri, ku është themeluar edhe Down Syndrome Albania, anëtare e Down Syndome Internatinal. Të dhënat statistikore flasin për 1 rast në 800 lindje e për një numër prej 684 vetësh me këtë sindromë. Nuk mungojnë rastet e diskriminimit, por as përpjekjet që njerëzve me këtë sindromë t’u mundësohet jeta e pavarur, punësimi e pjesëmarrja normale në gjirin e shoqërisë përkrah shokëve e moshatarëve të tyre.

Në Shqipëri vit për vit, më 21 mars, kremtohet Dita Botërore e Sindromës Down.