Ndërroi jetë në moshën 87 vjeçare atje, ku pati kaluar pothuajse gjithë jetën. Në Karaçi. Ku shkoi në fillim të viteve ‘50, për një kleçkë burokratike, ndërsa shtegtonte drejt Indisë. E ku edhe mbeti përgjithmonë. Motra Ruth gjeti qëllimin e jetës, në luftën kundër gërbulës, sëmundje, për të cilën pjesa kryesore e botës, ashtu si edhe ajo vetë, dunte pak e aspak. Në një vend ku të gërbulurit shpesh braktiseshin në shkretëritë, si ushqim për bishat.
Rregulltarja e “Bijave të Marisë”, që kishte kryer fakultetin e mjekësisë, u ndesh me gërbulën dhe e mundi, duke mjekuar mijëra të sëmurë në Pakistan, ku themeloi 170 spitale. U bë e njohur si “Nënë Tereza e Pakistanit” e ndërroi jetë dje, në qytetin e Karaçit, pak ditë para njëvjetorit të vdekjes së Shën Nënë Terezës. Pakistani, pikërisht ashtu si pati bërë India me Nënë Terezën, do ta përcjellë në banesën e fundme me funeral shtetëror, që do të kremtohet më 19 gusht, në Katedralen e Shën Patrikut. Motra-mjeke do të pushojë në paqe në varrezën e Gora Qabristan.
Duke theksuar kontributin e saj të pashoq për Pakistanin, kryeministri i vendit e kujtoi me fjalët: “Lindi në Gjermani, por me zemër ishte gjithnjë në Pakistan. E Pakistani nuk do ta harrojë kurrë!”.
All the contents on this site are copyrighted ©. |