Papa, CISL-it: miopi, t’i lësh në punë të moshuarit; punë për të rinjtë

Papa Françesku kritikoi sot pensionet jashtëzakonisht të larta, që krijojnë shkandull njëlloj si ato të pamjaftueshme. Kërkoi një pakt të ri punësimi, që të rinjtë të gjejnë punë. Ati i Shenjtë priti sot në Vatikan delegatët e sindikatës italiane CISL, e cila që sot e deri të shtunën është mbledhur në kongres.

Papa vuri theksin mbi rëndësinë e punës

         Papa pohoi se shoqëria është e pamend dhe miope, nëse i detyron të moshuarit të punojnë tepër gjatë, duke e lënë pa punë brezin e ri, pikërisht në moshën kur duhet të impenjohet edhe për të moshuarit e për të gjithë të tjerët. Në Itali, për shembull, rreth 40% e të rinjve nuk janë të punësuar:

         “Kur të rinjtë janë jashtë botës së punës, ndërmarrjeve u mungon energjia, entuziazmi, risia, gëzimi për të jetuar - pasuri të çmuara e të përbashkëta, që e përmirësojnë jetën ekonomike dhe lumturinë publike”.

Kritikë për pensionet e mëdha

         Më pas, Ati i Shenjtë nuk mungoi të kritikojë të ashtuquajturat “pensione të arta”, që në Itali janë ato, të cilat e tejkalojnë shifrën 2.500-3.000 euro në muaj:

        “Kur jo gjithmonë e jo të gjithëve u njihet e drejta për një pension të drejtë – të drejtë, sepse nuk duhet të jetë as tepër i varfër e as tepër i pasur – ‘pensionet e arta’ janë fyerje për punën jo më pak të rëndë të atyre, që kanë pensione tepër të vogla, pasi kështu, pabarazitë e kohës së punës bëhen të përhershme”.

Të rishikohen skemat e punësimit

         Bota e punës është në shndërrim të shpejtë, nënvizoi më tej Papa, prandaj duhen rishikuar skemat e deritanishme:

         “Është urgjent një pakt i ri shoqëror për punën, i cili t’i ulë orët e punës atij, që kalon sezonin e fundit të punësimit, për të krijuar kështu, punë për të rinjtë, të cilët kanë të drejtën e detyrën të punojnë. Dhurata e punës është dhurata e parë e nënave dhe e baballarëve për bijtë e bijat; është pasuria e parë e shoqërisë. Është paja e parë, me të cilën i ndihmojmë të fluturojnë të lirë drejt jetës së njeriut të rritur”.  

Sëmundjet e sindikatës

         Duke iu drejtuar sindikalistëve të CISL-it, Papa Françesku vuri në dukje sëmundjet, që mund të prekin këtë organ të vlefshëm për punëtorët. “Në shoqëritë tona kapitaliste të përparuara – nënvizoi – sindikata ka rrezik ta humbasë natyrën e saj profetike dhe të bëhet tepër e ngjashme me institucionet e me pushtetet, të cilat duhet t’i kritikojë. Me kalimin e kohës, sindikatat po i ngjajnë gjithnjë e më tepër politikës, ose më mirë, partive politike, gjuhës së tyre, stilit të tyre. Por, nëse mungon përmasa tipike dhe e ndryshme, edhe veprimtaria brenda ndërmarrjeve e humbet forcën dhe frytshmërinë”.

 

Ekonomia, gjithnjë në shërbim të njeriut

         Ekonomia, theksoi më tej Ati i Shenjtë, duhet të jetë gjithnjë e vetëm në shërbim të njeriut:

         “Të themi ‘ekonomi shoqërore e tregut’, siç na ka mësuar Shën Gjon Pali II… ‘ekonomi shoqërore e tregut’. Ekonomia e ka harruar këtë natyrë shoqërore, të cilën e ka vokacion… natyrën shoqërore të ndërmarrjes, të jetës, të lidhjeve e të pakteve”.