Երեւանեան միջազգային կիթառի փառատօն։

ՀՀ մշակոյթի նախարարութեան, «Փիւնիկ» մարդկային միջոցներու զարգացման համահայկական հիմնադրամին, Հայկական Բարեգործական Ընդհանուր Միութեան (ՀԲԸՄ) եւ «Երազարտ» հիմնադրամին աջակցութեամբ` Յունիս 29-Յուլիս 9 պիտի կայանայ Երեւանեան միջազգային կիթառի 3-րդ փառատօնը:

Փառատօնին կազմակերպիչներն են Երեւանի կիթառահարներու եւ Կիթառի միջազգային փառատօներու ընկերակցութիւնները: Փառատօնին գեղարուեստական ղեկավարն է Երեւանի կիթառահարներու ընկերակցութեան նախագահ, միջազգային մրցոյթներու դափնեկիր Ժորա Սարգսեանը:

Երրորդ տարին իրականացուող երաժշտական այս տօնը հայ կիթառահարներուն հնարաւորութիւն պիտի ընձեռէ ծանօթանալու ժամանակակից դասական կիթառի միջազգային դպրոցին, ինչպէս նաեւ կիթառի սիրահարներուն`  ունկնդրելու իւրօրինակ երաժշտութիւն եւ մասնակցելու վարպետութեան դասերու:

Մինչ փառատօնը՝ մասնակիցները Յունիս 27-ին Գանձասարի մէջ պիտի ներկայանան Արցախի ունկնդիրին:

Փառատօնին բացումը պիտի կայանայ Յունիս 29-ին` ժամը 19:00-ին, Կոմիտասի թանգարան-ուսումնարանին մէջ:

Յուլիս 1-ին Ջերմուկի մէջ` Ճատրակի միջազգային մրցաշարի բացման արարողութեան ընթացքին՝ համերգով հանդէս պիտի գան Ժորա Սարգսեանը, Սարօ Բաբիկեանը (ԱՄՆ), Էդուարդ Հրմուշեանը (Հայաստան), Հենրիկ Մելիքեանը (Հայաստան), ինչպէս նաեւ Յասմիկ Ասատրեանը (վոկալ, Հայաստան): Փառատօնային յաջորդ համերգը տեղի պիտի ունենայ Յուլիս 4-ին` ժամը 19:00-ին, Կոմիտասի անուան կամերային երաժշտութեան տան մէջ: Մենահամերգով հանդէս պիտի գայ Ս. Փեթերզպուրկի երաժշտանոցի դասախօս Վլատիմիր Գիրասիրովը (կիթառ, Ռուսիա): Յուլիս 5-ին` ժամը 19:00-ին, Հայկական Բարեգործական Ընդհանուր Միութեան տան մէջ պիտի իրականացուի փառատօնային յաջորդ համերգը: Ելոյթներով հանդէս պիտի գան Վաժա Գալանտաձէն (Վրաստան), Սարօ Բաբիկեանը (ԱՄՆ), Էդուարդ Հրմուշեանը (Հայաստան), Հենրիկ Մելիքեանը (Հայաստան), Գէորգի Գուձանաշվիլին (Վրաստան): Համերգը իւրայատուկ է անով, որ երեկոյին ընթացքին պիտի ստեղծուի հայ-վրացական կիթառի նուագախումբ. երեկոյին ընթացքին հանդէս պիտի գայ 20 կիթառահար, որ բացառիկ երեւոյթ է տարածաշրջանին մէջ:

Փառատօնին փակումը պիտի նշանաւորուի իւրայատուկ համերգ-երեկոյով. Յուլիս 9-ին` ժամը 20:00-ին, «Գաֆէսճեան» արուեստի կեդրոնի դահլիճին մէջ հանդէս պիտի գան Վլատիմիր Գիրասիրովը (Ռուսիա), Ժորա Սարգսեանը, Եւգենիա Մարկովան (Ռուսիա), Արիկ Բամբիրը (Հայաստան), Վահագն Մարգարեանը (Հայաստան), Եւա Գէորգեանը (Հայաստան), Պերճ Նահապետեանը (Հայաստան):

Փառատօնին ընթացքին պիտի ներկայացուին տարբեր դարաշրջաններու երգահաններու ստեղծագործութիւններ:

Փառատօնին ծիրէն ներս պիտի կազմակերպուին վարպետութեան դասեր, որոնք բաց պիտի ըլլան բոլոր երաժշտասէրներուն համար: Յունիս 30-ին, Երեւանի Պ. Չայքովսքիի անուան միջնակարգ երաժշտական մասնագիտական դպրոցին մէջ, վարպետութեան դասով հանդէս պիտի գայ Ագուստին Պէսնոնը, իսկ Յուլիս 6-ին, ՀԲԸՄ դահլիճին մէջ, վարպետութեան դաս պիտի իրականացնէ Վլատիմիր Գիրասիրովը: