Trupi i Gjonit XXIII do të kthehet në Bergamo për disa ditë

Trupi i shën Gjonit XXIII do të kthehet për disa ditë në Bergamo, vitin e ardhshëm. Lajmin e dha sot paradite dioqeza, e cila i pati çuar kërkesën për këtë Papës Françesku.

60-vjetori i zgjedhjes në fronin e Shën Pjetrit

         Nuk dihen akoma hollësitë dhe data e saktë, por kuria e kryeqendrës lombarde njoftoi sot se Ati i Shenjtë e ka lejuar këtë zhvendosje të përkohshme e të jashtëzakonshme. Ndoshta, trupi i shën Gjonit XXIII do të mbërrijë në qytetin e Bergamos dhe në fshatin e lindjes Sotto il Monte (Nën Mal) më 3 qershor, në 55-vjetorin e vdekjes e në 60-vjetorin e zgjedhjes së “Papës së Mirë” në fronin e Shën Pjetrit. Siç kujton ipeshkvi i Bergamos, imzot Francesco Beschi, Papa Roncalli ishte krenar, që vinte nga Bergamo, pasi prej këtyre anëve e kishte marrë humanitetin, përshpirtërinë, durimin në vështirësi, gatishmërinë për ta ndarë me të varfërit atë pak, që kishte, aftësinë e tij për të parë aspektet pozitive, më shumë se ato negative dhe për t’i bazuar marrëdhëniet me të tjerët në gjithçka bashkon, më tepër se në gjërat që ndajnë.