2017-06-24 10:05:00

Հրապարակուեցաւ Ֆրանչիսկոս Պապին Քոլոմպիա կատարելիք առաքելական ճամբորդութեան յայտագիրը։


(Ռատիօ Վատիկան) Ինչպէս յայտարարուած էր` յառաջիկայ Սեպտեմբեր 6-11, Ֆրանչիսկոս Սրբազան Քահանայապետը, առաքելական ճամբորդութեամբ կը մեկնի  Քոլոմպիա որպէս ճամբորդութեան բնաբան ունենալով ''առաջին քայլը կատարենք''։

Սրբազան Քահանայապետը Հռոմի օդակայանէն կը մեկնի 6 սեպտեմբերի առաւօտեան 11-ին ուղղուելով դէպի Պոկոթա ուր ժամանումը նախատեսուած է, տեղական ժամանակով 16,30-ին եւ ուր տեղի կ՛ունենայ բարի գալուստի արարողութիւնը։

Հինգշաբթի 7 Սեպտեմբերին Սրբազան Քահանայապետը`  ''Plaza de Armas della Casa de Nariño''-ի մէջ կ՛ունենայ  երկրին իշխանութիւններուն հետ պաշտօնական առաջին հանդիպումը, անոնց ուղղելով ճառ մը, ապա քաղաքավարական այցելութիւն կու տայ Երկրին նախագահին որմէ ետք կ՛այցելէ Պոկոթայի Աթոռանիստ Եկեղեցին ու Եկեղեցւոյ ''կարդինալական պալատի'' պատշգամէն կ՛օրհնէ այնտեղ համախմբուած հաւատացեալները, հուսկ Կարդինալական Պալատին մէջ կը հանդիպի Քոլոմպիայի եպիսկոպոսական համահաւաք դասի անդամներուն հետ, անոնց ուղղելով իր պատգամը, մինչ յետմիջօրէին` Առաքելական Պատուիրակութեան նստավայրին մէջ, Սրբազան Քահանայապետը կը հանդիպի  Լատինամերիկայի Եպիսկոպոսական համահաւաք դասի վարչական կազմի անդամներուն հետ, անոնց եւս ուղղելով իր պատգամը ու յետմիջօրէի 4,30-ին ''Սիմոն Պոլիվար'' այգիի տարածքին կը գլխաւորէ Սուրբ Պատարագի արարողութիւնը որով վերջ կը գտնէ Սրբազան Հօր Քոլոմպիա կատարած այցելութեան երկրորդ օրուայ յայտագիրը։

Ուրբաթ 8 սեպտեմբերին, Սրբազան Քահանայապետը` Պոկոթայէն կը փոխադրուի Վիլլավինչենսիօ ուր կը ժամանէ առաւօտեան 8,30-ին եւ 9,30-ին ''Քաթամա'' անուամբ տարածքին վրայ կը մատուցէ սուրբ պատարագը մինչ յետմիջօրէի 15,40-ին կը նախագահէ ''Ազգային Հաշտութեան ի սպաս'' կազմակերպուած աղօթքի մեծ հաւաքին, որուն առթիւ կ՛ուղղէ իր սրտին խօսքը ու նախ քան Պոկոթա վերադառնալը ''Parque de los  Fundadores'' այգիին մէջ պահ մը կ՛ամփոփուի  ''Հաշտութեան Խաչի'' դիմաց, ապա կ՛ուղղուի Վիլլավինչենսիօ զինուորական օդակայան որտեղէն վերադարձ կը կատարէ Պոկոթա։

Շաբաթ 9 Սեպտեմբերին, Սրբազան Քահանայապետը կ՛այցելէ Մետելլին քաղաքը ուր առաւօտեան 10,15-ին կը մատուցէ սուրբ պատարագը իսկ յետմիջօրէին հանդիպում կ՛ունենայ տեղական կղերական դասին ու անոնց ընտանեկան պարագաներուն հետ­, անոնց ուղղելով ճառ մը։ Հանդիպման աւարտին   Սրբազան Քահանայապետը վերադարձ կը կատարէ Պոկոթա աւարտելով չորրորդ օրուայ յայտագիրը։

Կիրակի 10 Սեպտեմբերին Սրբազան Քահանայապետը կ՛այցելէ Քարթակենա քաղաքը ուր առաւօտեան 10,30-ին կ՛օրհնէ ''տնանկներու'' յատկացուած կեդրոնատեղիի առաջին քարը, ապա ''San Pietro Claver'' եկեղեցւոյ առջեւ կ՛արտասանէ Կիրակնօրեայ Մարեմեան աղօթքը որմէ ետք կ՛այցելէ նաեւ ''San Pietro Claver'' Սրբավայրը։

Յետմիջօրէի 3,45-ին Սրբազան Քահանայապետը կը փոխադրուի ''Քոնթեքար'' անուամբ զինուորական կեդրոնատեղիի նաւահանգիստ, ուր կը գլխաւորէ եզրափակիչ Սուրբ պատարագի արարողութիւնը,  որուն աւարտին ինքնաթիռով կ՛ուղղուի Քարթակենայի օդակայան եւ այնտեղ տեղի ունեցող հրաժեշտի արարողութեան աւարտին, տեղական ժամանակով երեկոյեան 7-ին կը բարձրանայ օդանաւ ու վերադարձ կը կատարէ դէպի Հռոմ` ուր ժամանումը նախատեսուած է երկուշաբթի 11 սեպտեմբեր 2017-ի ժամը 12,40 անց։








All the contents on this site are copyrighted ©.