Մոսկուա միացեալ նահանգները կը զգուշացնէ Սուրիոյ կառավարական ուժերուն դէմ ուժ կիրարկելէն

Ռուսիոյ արտաքին գործոց նախարարութիւնը, մեկնաբանելով ամերիկեան օժուժին կողմէ սուրիական ռմբաձիգի վար առնուելուն դէպքը, յայտարարեց. «Մոսկուա կը զգուշացնէ Միացեալ Նահանգները սուրիական կառավարական ուժերուն դէմ ուժ կիրարկելէն»:

Նախարարութիւնը նշեց, որ մտահոգ է սուրիական օդանաւի վար առնուելուն դէպքով եւ զայն կը նկատէ «դէպի վտանգաւոր մագլցում առաջնորդող քայլ մը»:

Ռուսիոյ արտաքին գործոց նախարար Սերկէյ Լաւրով իր կարգին յայտարարեց, որ բոլոր երկիրները պարտաւոր են յարգել Սուրիոյ գերիշխանութիւնն ու տարածքային ամբողջականութիւնը եւ Սուրիոյ հողին վրայ բոլոր գործողութիւնները պէտք է համակարգուած ըլլան Դամասկոսի հետ:

Լաւրովի խօսքով` Մոսկուա կոչ կ՛ուղղէ Ուաշինկթընի` աշխատանքի համակարգում ապահովելու Սուրիոյ մէջ եւ յարգելու այդ երկրին գերիշխանութիւնը` նշելով, որ լարուածութեան մեղմացման գօտիները միասնաբար յառաջ ընթանալու հաւանական տարբերակներէն են:

«Բոլորը կը հրաւիրենք խուսափելու միակողմանի գործողութիւններէն, յարգելու Սուրիոյ գերիշխանութիւնը եւ ներգրաւուելու մեր ընդհանուր աշխատանքին մէջ, որ համակարգուած է Սուրիոյ արաբական հանրապետութեան կառավարութեան հետ», աւելցուցած է Լաւրով:

Ռուսիոյ պաշտպանութեան նախարարութիւնը յայտարարեց, որ «Սուրիոյ մէջ մեր ուժերու գործունէութեան շրջանին վերեւ որեւէ թռչող սարք թիրախ պիտի նկատենք»` աւելցնելով. «Ուաշինկթըն սուրիական օդանաւը վար առնելէ առաջ Մոսկուայի հետ կապ չհաստատեց»: Նախարարութիւնը ամերիկեան ղեկավարութենէն պահանջեց սուրիական օդանաւի վար առնուելուն շուրջ հետաքննութիւն կատարել եւ ատոր արդիւնքը փոխանցել Ռուսիոյ: