Ռուսիոյ նախագահ Վլատիմիր Փութին «Էն.Պի.Սի.» պատկերասփիւռի կայանին հետ հարցազրոյցի մը ընթացքին յայտարարած է, որ Միացեալ Նահանգներ կը միջամտեն ամբողջ աշխարհի քաղաքական հոլովոյթներուն, սակայն կը մեղադրեն Ռուսիան նախագահական ընտրութիւններուն միջամտելու ամբաստանութեամբ: Այս մասին կը հաղորդէ «Կազեթա» կայքը:
«Ես ոչ ոքի կ՛ուզեմ նեղացնել, սակայն Միացեալ Նահանգներ ամէնուր` ամբողջ աշխարհի վրայ, աշխուժօրէն կը միջամտեն այլ երկիրներու նախընտրական արշաւներուն», ըսած է Ռուսիոյ ղեկավարը:
Փութինի համաձայն, «ամէնուր ձեզ կը բողոքեն, որ ամերիկեան պաշտօնատար անձեր կը միջամտեն իրենց ներքին քաղաքական հոլովոյթներուն»:
«Ես չեմ ըսեր, որ մենք չենք միջամտած, սակայն եթէ մէկը որեւէ ձեւով կ՛ազդէ կամ կը փորձէ ազդել, կամ որեւէ ձեւով կը մասնակցի այդ հոլովոյթներուն, Միացեալ Նահանգները բողոքելու բան չունին: Ո՞վ մեզի կ՛ըսէ, ո՞վ կը նեղանայ մեզմէ միջամտութեան համար: Դո՛ւք էք, որ անընդհատ կը միջամտէք», ընդգծած է Ռուսիոյ նախագահը:
Մեկնաբանելով այն տեղեկատուութիւնը, թէ Ուաշինկթընի մէջ Ռուսիոյ դեսպան Սերկէյ Քիսլիաք Թրամփի փեսային եւ այժմ խորհրդականին` Ճարետ Քուշների հետ քննարկած է ընտրապայքարի ծիրին մէջ «Քրեմլինի հետ փակ հաղորդակցութեան միջոց»-ի ստեղծման կարելիութիւնը, Փութին նշած է. «Ռուսիան ո՛չ մէկ կարգի հաղորդակցութեան միջոց ստեղծած է եւ ո՛չ մէկուն հետ ոչ մէկ կարգի հաղորդակցութեան միջոց ունեցած է: Թերեւս ինչ-ինչ պաշտօնական հաղորդակցութիւններ եղած են բոլոր թեկնածուներու ընտրական գրասենեակներու հետ, ատիկա բնական դիւանագիտական գործելաոճ է»:
«Պարզապէս մէկը որոշած է կառչիլ ատոր եւ ատիկա ընտրած է իբրեւ գործող նախագահին վրայ յարձակում գործելու միջոց», նշած է Ռուսիոյ նախագահը` աւելցնելով. «Դուք պարապ տեղ աղմուկ բարձրացուցած էք եւ զայն գործող նախագահին դէմ պայքարի միջոցի վերածած»:
All the contents on this site are copyrighted ©. |