Հայկական եւ համաշխարհային մշակոյթի պատմութեան մէջ բացառիկ նշանակութիւն եւ ուրոյն տեղ զբաղցուցած Մխիթարեան միաբանութիւնը այս տարի պիտի նշէ Վենետիկի Սուրբ Ղազար կղզի մուտք գործելուն 300-ամեակը:
Մխիթար Սեբաստացիի, ինչպէս նաեւ միաբանութեան գործունէութիւնը հանրութեան լայն շրջանակներուն ներկայացնելու ու հանրահռչակելու նպատակով՝ «Պատմամշակութային արգելոց-թանգարաններու եւ պատմական միջավայրի պահպանութեան ծառայութիւն» ՊՈԱԿ-ի (պետական ոչ առեւտրային կազմակերպութիւն) տնօրէնութիւնը նախաձեռնած է Սեպտեմբեր 21-ին «Զուարթնոց» պատմամշակութային-արգելոց թանգարանին մէջ բանալ «Ձայն տուր, ով կղզեակ» խորագիրով ցուցահանդէս:
Հոգեւոր, ուսումնակրթական, գիտական եւ մշակութային կազմակերպութիւնը հիմնադրած է Մխիթար Սեբաստացին` 1701-ին, Կոստանդնուպոլսոյ մէջ: 1717-ին միաբանութիւնը հաստատուած է Վենետիկի մերձակայ Սբ. Ղազար կղզիին մէջ` վերածելով զայն իւրայատուկ ոգեղէն Հայաստանի` կեանքի կոչելով Մխիթարեան միաբանութեան կարգախօսը` «Ի փառս Աստուծոյ եւ յանուն լուսաւորութեան ազգի մերոյ»:
ՊՈԱԿ-ի կայքին փոխանցած տեղեկութիւններով՝ ցուցահանդէսի նախապատրաստական աշխատանքները արդէն իսկ ընթացքի մէջ են: ՊՈԱԿ-ի ցուցադրութիւններու կազմակերպման բաժինի վարիչ Էլմիրա Եսայեան՝ Վենետիկ մէկշաբաթեայ գործուղման ընթացքին ծանօթացած է արխիւային հարուստ ու հետաքրքրական նիւթերու:
Նախանշուող ցուցադրութիւնը յաւուր պատշաճի կազմակերպելու նպատակով՝ «Պահպանութեան ծառայութիւն» ՊՈԱԿ-ի տնօրէն Արա Թարվերդեան հանդիպած է Հայաստանի Մխիթարեան կրթահամալիրի պատասխանատու Հայր Եղիայի հետ, քննարկած ցուցադրութեան կազմակերպչական աշխատանքներուն, արխիւային ու բնագիր նիւթերուն առնչուող հարցեր:
ՊՈԱԿ-ի տնօրէնը խօսած է Մխիթարեան միաբանութեան արխիւային հարուստ նիւթերու որոշ մասը ցուցադրութեան ներկայացնելու, մասնաւորապէս` միաբանութեան կազմաւորման վերաբերող հռչակագիրին, միաբանութեան մէջ ուսանած ու աշխատած նշանաւոր մարդոց, օտար հանճարներու բնագիր նիւթերուն, անձնական իրերուն եւ այլնի մասին:
Հայր Եղիան պատրաստակամութիւն յայտնած է ՊՈԱԿ-ի ցուցադրութիւններու բաժինին հետ համատեղ աշխատելու՝ իւրաքանչիւր նիւթի մշակման, հաւաքման ուղղութեամբ: Անոր խօսքով, ցուցադրութեան ներկայացուելիք արխիւային նիւթերուն համար ալ հարկ պիտի ըլլայ գրութեամբ դիմելու Վենետիկ` Մխիթարեան միաբանութեան:
All the contents on this site are copyrighted ©. |