Рэліквіі св. Мікалая ў Расіі: Патрыярх удзячны Папу

Патрыярх Маскоўскі і ўсяе Русі Кірыл пераказаў Святому Айцу Францішку старадаўнюю ікону св. Мікалая Цудатворца і памятныя медалі, звязаныя з патрыяршым служэннем, дзякуючы яму за садзейнічанне ў перэгрынацыі рэліквій св. Мікалая па Расіі.

“Цяперашняе радасная падзея стала яшчэ адным канкрэтным вынікам нашай сустрэчы з папам Францішкам на Кубе, дзе былі закрануты пытанні, якія тычацца двухбаковых адносін паміж нашымі Цэрквамі, а таксама праваслаўна-каталіцкага супрацоўніцтва па найбольш актуальных пытаннях сучаснасці”, - сказаў Патрыярх Кірыл 22 мая 2017 г., вітаючы каталіцкую дэлегацыю ў сваёй маскоўскай рэзідэнцыі. Паводле яго, “прынясенне ў Расію рэліквій вялікага Божага праведніка, шанаванага як на Усходзе, так і на Захадзе, з’яўляецца яркім прыкладам нашага агульнага сведчання аб хрысціянскай веры”.

Частку рэліквій св. Мікалая даставілі з італьянскага Бары ў Маскву 21 мая 2017 г. У храме Хрыста Збаўцы святыню сустрэў Патрыярх Маскоўскі і ўсяе Русі Кірыл. Рэліквіі хрысціянскага святога будуць знаходзіцца ў Расіі з 21 мая па 28 ліпеня, спачатку ў Маскве, а потым у Пецярбургу.

Пра тое, што рэліквіі даставяць у Расію, Кірыл і Францішак дамовіліся падчас гістарычнай сустрэчы ў Гаване ў лютым 2016 г. Да гэтага яны ніколі не пакідалі італьянскі горад Бары, дзе захоўваюцца вось ужо 930 гадоў. Кіраўнік Аддзела знешніх царкоўных сувязяў Маскоўскага Патрыярхату, Мітрапаліт Валакаламскі Іларыён і арцыбіскуп Бары Франчэска Какучы падпісалі спецыяльную дамову аб часовай перадачы часткі рэліквій св. Мікалая Цудатворцы.