2017-05-14 10:57:00

Meditim: "Në dritën Tënde"


Meditim, frymëzuar nga Liturgjia e së Dielës V të Pashkëve ‘A’)

Në dritën Tënde 

I kërkojmë ethshëm udhët

ku fshihet lumturia:

udhët vezulluese të suksesit,

udhët buçimtare të pushtetit,

udhët aq joshëse të kamjes,

udhët e rehatshme

të  mbylljes në vetvete,

udhët rrëshqitëse të kënaqësive,

shijuar shpejt e shpejt…

Na rrejtën, o Zot,

për krahu na morën

drejt shtegut të verbër

të frymës së ligë!

Gëzim na premtuan,

na lanë pa shpresë.

Premtuan udhë,

na lanë buzë honi.

Kënaqje premtuan,

na dhanë kënaqësi pa krena!

Besuam në mirëqenie

e  sot vajtojmë në varfëri;

Na joshën me rininë,

mendjen na e shprishën

e u plakëm para kohe,

harruam der’ emrin tonë!

Atëherë u dehëm tapë

e veshët i mbyllëm

për njëmijë zërat

e botës gënjeshtare.

Se s’ka më shpresë besuam…

s’ka jetë,

s’ka udhë,

s’ka të vërtetë…

E veç atëherë kuptuam

se Ti je shpresa;

je udha

je e vërteta…

se vetëm Ti na nxjerr

nga terri i shpirtit tonë,

e shohim hijet në Dritë!

Ti vetëm na tregon

fytyrën e Zotit

e na i ndriçon

shtigjet më të errta të zemrës.








All the contents on this site are copyrighted ©.