Rojet Zvicerane takohen me Papën e bëjnë betimin

Papa Françesku, priti sot paradite Rojet Zvicerane, të cilat, në orën 17.00, bënë betimin në Oborrin e Shën Damazit, me një ceremoni sugjestive e shumëngjyrëshe, që tashmë është bërë traditë. Kësaj radhe, diçka e veçantë. Bënë betimin rojet e para, që kanë ndjekur modelin e ri të shkollës së rekrutëve: një muaj në qendrën e formimit të policisë në katonin Tiçino, para se të fillojnë kursin në Vatikan.

         Ceremonia u kryesua nga zëvendësi i Sekretarisë së Shtetit, imzot Paolo Borgia, në praninë e autoriteteve zvicerane si presidenti i Konfederatës Helvetike, Doris Laufhard, dhe presidenti i Këshillit të Shteteve, Ivo Bischofberger. Gjithashtu, morën pjesë edhe qeveria kantonale e Obvaldos, udhëhequr nga kryetari Franz Enderli, dhe kreu i Konferencës Ipeshkvnore, imzot Charles Morerod.

         Betimi u parapri nga mesha e kryesuar nga prefekti i Kongregatës për Doktrinën e Fesë, kardinali Gerhard Ludëig Müller, në elterin e Katedrës së Bazilikës së Shën Pjetrit, në Vatikan. Ndërkaq, të premten, rekrutët e rinj morën pjesë në kremtimin e Mbrëmësoreve në kishën e Zojës së Mëshirës në Varrezat Teutonike. Më pas, në sheshin e Protomartirëve romakë, gjithnjë brenda Vatikanit, u vendos një kurorë me lule në kujtim të 147 rojeve, të cilat humbën jetën për të mbrojtur Papën gjatë plaçkitjes së Romës nga lancikenekët në vitin 1527.