Ոչ եւս է Պալթիմորայի թեմի երբեմնի առաջնորդ կարդինալ Վիլիամ Հենրի Քիլեր

(Ռատիօ Վատիկան) Հինգշաբթի, 23 մարտ 2017-ին, 86 տարեկանին,  իր  մահկանացուն կնքեց  Միացեալ Նահանգներու Պալթիմորայի թեմի երբեմնի արքեպիսկոպոս Կարդինալ Վիլիամ Հենրի Քիլերը։  

 Ծիրանաւորին մահուան  լուրին առիթով , ուրբաթ, 24 մարտին, Ֆրանչիսկոս Պապ ցաւակցական հեռագիր մը յղեց Պալթիմորայի թեմիn Արքեպիսկոպոս գերապայծառ Վիլիամ Է Լորիին, որուն մէջ իր ցաւակցութիւնները յայտնեց թեմի կղերին ու հաւատացեալներուն։ Ան երախտագիտութեամբ յիշելով ննջեցեալին՝  թեմին  եւ եկեղեցւոյ մէջ կատարած   բեղուն առաքելութիւնը,  իր մխիթարանքի առաքելական օրհնութիւնը շնորհեց  Պալթիմորայի թեմի կղերին, եւ  բոլոր անոնց որոնք կ՛ ողբան ծիրանաւորին մահը։

Կարդինալ Վիլլիամ Հենրի Քիլերի մահով, կարդինալական դասը  այժմ կը հաշուէ  ընդհանուր 223 կարդինալներ,  որոնցմէ 117-ը  քահանայապետ ընտրելու իրաւունք ունեցող կարդինալներ  են իսկ  106 կարդինալները առանց ընտրական իրաւունքի։