Գերմանիոյ Ընկերվար-ժողովրդավարական կուսակցութեան արտահերթ համագումարի պատուիրակները քուէարկած են իրենց քաղաքական ուժի նախագահի պաշտօնին մէջ Եւրոպական խորհրդարանի նախկին ղեկավար Մարթին Շուլցի ընտրութեան օգտին:
Ան հաւաքած է 100 առ հարիւր ձայն, ինչ որ ցուցանիշ կը հանդիսանայ կուսակցութեան ամբողջ պատմութեան մէջ: Շուլց փոխարինած է Զիկմար Կապրիէլը եւ պաշտօնապէս դարձած Գերմանիոյ վարչապետի թեկնածու եւ Անկելա Մերքելի գլխաւոր մրցակից:
Մարթին Շուլց Պերլինի մէջ տեղի ունեցած խորհրդաժողովի մը ընթացքին իր արտասանած խօսքին մէջ յայտնած է, որ ներկայիս Թուրքիոյ մէջ ժողովրդավարութիւնը աստիճանաբար կը կազմաքանդուի:
«Բաց հասարակութեան վրայ ճնշումը անձնիշխանական ուժերու կողմէ, որոնք հետզհետէ կը շատնան ամէնուրեք աշխարհին մէջ, կը սաստկանայ: Անոնք կ՛ուզեն մեզի եւ հասարակութեան պարտադրել իրենց քաղաքականութիւնը, իրենց արժէքները, որոնք տրամագծօրէն հակառակն են մեր յառաջդիմական արժէքներուն: Անոնք հանդէս կու գան յանուն ազգային մեկուսացման, յանուն բաց հասարակութիւններու դէմ պայքարի: Անոնք աշխուժօրէն հանդէս կու գան յանուն բաժանման, կը կատարեն ընկերային, ազգայնական եւ կրօնական սահմանազատումներ, անոնք մարդիկը կը տրամադրեն իրարու դէմ:
«Այսպէս, լրագրողները առանց պատճառի կը կալանաւորեն եւ կը հարկադրեն լռել: Զանգուածային լրատուամիջոցներու ազատութիւնը բացայայտօրէն յարձակումի կ՛ենթարկուի: Այսպէս, ներկայիս Թուրքիոյ մէջ ժողովրդավարութիւնը աստիճանաբար կը կազմաքանդուի», ըսած է Շուլց:
All the contents on this site are copyrighted ©. |