Ватыкан: апублікавана фінансавая справаздача за 2015 г.

Дэфіцыт бюджэту Апостальскай Сталіцы за 2015 г. склаў 12,4 млн еўра, а прафіцыт Дзяржавы Ватыкан – 59,9 млн. еўра. Такі вынік канчатковага балансу за 2015 г., які быў апублікаваны 4 сакавіка 2017 г. Сакратарыятам па эканамічных пытаннях Святога Пасаду.

Галоўнымі крыніцамі даходу Апостальскай Сталіцы ў 2015 г. былі: ахвяраванні біскупаў усіх дыяцэзій свету, згодна з канонам 1271 Кодэкса кананічнага права, якія склалі 24 млн. еўра, а таксама ўнёсак Інстытута рэлігійных спраў, так званага Ватыканскага банка, раўны 50 млн. еўра. Паводле справаздачы, самыя значныя выдаткі Апостальскай Сталіцы звязаны з аплатай працы персанала. 

Губернатарат Дзяржавы Ватыкан атрымлівае найбольшыя прыбыткі ад культурных мерапрыемстваў, галоўным чынам звязаных з дзейнасцю Ватыканскіх музеяў.

Сакратарыят па эканамічных пытаннях паінфармаваў аб паступовым увядзенні новай палітыкі фінансавага кіравання, адзначаючы, што для яе поўнай рэалізацыі спатрэбіцца яшчэ некалькі гадоў.