பாசமுள்ள பார்வையில்.. தனக்காக துடிக்காத அம்மாவின் இதயம்

தன் அப்பாவுடன், காரில் சென்றுகொண்டிருந்த கல்லூரி மாணவி ஒருவர், தனது படிப்பு சார்ந்த ஒரு திட்டத்திற்காக, அப்பாவிடம் சில கேள்விகளைக் கேட்டார். அப்பா, உங்களின் முழுப் பெயர் என்ன? உங்களுக்கு எத்தனை நண்பர்கள்? நீங்கள் உடல்நலத்தை எப்படி பேணுகின்றீர்கள்? நம் வீட்டில் எத்தனை ஆண்டுகளாக வாழ்கிறீர்கள்?... இப்படி சில கேள்விகள். தினமும் காலையில் நடக்கப்போவது, தினமும் நண்பர்களைச் சந்தித்துப் பேசுவது, மூன்று தலைமுறையாக ஒரே வீட்டில் வாழ்வது என, தன்னைப் பற்றிச் சொன்னார் அப்பா ராஜன் தினேஷ். அப்போது அந்த மாணவி, அப்பா, இதே கேள்விகளை இன்னொருவரிடமும் கேட்டுப் பதிவு செய்துள்ளேன், அதைக் கேளுங்கள் என்று, அதை ஒலிக்கச் செய்தார்.   

அம்மா.. உங்களின் முழுப் பெயர்.. கல்யாணத்துக்கு முன், செல்வி ஆகாஷ். கல்யாணத்துக்குப் பின் செல்வி தினேஷ். அம்மா.. உங்களுக்கு எத்தனை நண்பர்கள்? திருமணத்திற்குமுன் பள்ளி, கல்லூரி, வீட்டுப் பக்கம் என நிறைய நண்பர்கள். ஆனால் இப்போது, உன் அப்பாவின் நண்பர்களில் மூவரின் மனைவிகள் மட்டுமே. அம்மா.. உங்கள் உடல்நலனை எப்படி பேணுகின்றீர்கள்? நேரம் இருந்தால் இதில் கவனம் செலுத்தலாம். ஆனால், காலையில் உன்னைக் கல்லூரிக்கும், உன் தம்பியை பள்ளிக்கும், உன் அப்பாவை அலுவலகத்திற்கும் அனுப்ப வேண்டும், பிறகு, வீட்டுவேலை. இதில் எப்படி உடல்நலத்தைக் கவனிப்பது, அதனால்தான், நீயும், உன் தம்பியும் சிசேரியனில் பிறந்தீர்கள். அம்மா.. உங்களுக்குப் பிடிக்காத விடயத்தை யாருக்காகவாவது செய்ததுண்டா? கல்யாணத்துக்கு முன்னாள் நான் சுத்த சைவம். பள்ளியில் என் நண்பர்கள் அசைவம் கொண்டு வந்திருந்தால் தள்ளிப் போயிடுவேன், அதைப் பார்க்கவே பிடிக்காது.. ஆனால், கல்யாணத்துக்குப் பிறகு, உன் அப்பாவுக்காக அசைவம் சமைக்கிறேன்... இதுவரை அந்த ஒலிப்பதிவைத் கேட்டு வந்த அப்பா, அதற்கு மேல் கேட்க முடியாமல் காரை நிறுத்தினார்.   

அம்மாவின் வாழ்வில், வாழ்ந்த வீட்டிற்கும், வாழ்க்கைப்பட்ட வீட்டிற்கும் இடையில், எல்லாமே மாறிப்போய் விடுகின்றன. அம்மாவின் ஒரு கண்ணில் சூரியன், இன்னொரு கண்ணில் நிலவு. அவர் இரண்டு விழிகளையும் மூடி உறங்கியதே இல்லை. அவரது பெயரில் பாதி, கணவருடையது, அவரது உடலில் பாதி, குழந்தைகளுடையது. குடும்பம், அவரின்றி ஒரு நிமிடமும் அசையாது. ஆம். அம்மாவின் இதயம், தனக்காக என்றுமே துடித்தது கிடையாது.

ஆதாரம் : வத்திக்கான் வானொலி