Վարչապետ Կարապետեան կարեւոր կը համարէ սփիւռքի հետ աշխոյժ համագործակցութիւնը
Վարչապետ Կարէն Կարապետեան այցելած է Ռազմավարական նախաձեռնութիւններու կեդրոն, ուր
խորհրդակցութեան ընթացքին քննարկուած են Հայաստանի մէջ տարբեր ներդրումային ծրագիրներու,
կառավարման ոլորտին մէջ սփիւռքի ներգրաւման ու առկայ ներուժի իրացման ուղղուած հարցեր:
ՀՀ սփիւռքի նախարար Հրանոյշ Յակոբեան մանրամասն ներկայացուցած է սփիւռքի հայկական գաղթօճախներուն
հետ համագործակցութեան ուղղութիւնները եւ նշած, որ ստեղծուած է աշխարհի գրեթէ բոլոր երկիրներուն
մէջ հայ համայնքներուն հետ յարաբերութիւններու լայն ցանց: Հրանոյշ Յակոբեանի խօսքով`
կատարուած են ծաւալուն աշխատանքներ սփիւռքի ներուժը Հայաստանի եւ Արցախի զարգացման ուղղելու
նպատակով, որուն արդիւնքով կան բազմաթիւ յաջողակ օրինակներ:
Ըստ gov.am-ի` Վարչապետ Կարապետեան կարեւոր համարած է սփիւռքի հետ աշխոյժ համագործակցութիւնը
եւ նախարարին յանձնարարած շահագրգիռ գերատեսչութիւններու, Ռազմավարական նախաձեռնութիւններու
կեդրոնին հետ համատեղ, արդէն իսկ մշակուած ներդրումային ծրագիրներու փաթեթները հետեւողականօրէն
ներկայացնել սփիւռքահայ ներդրողներուն: Կարէն Կարապետեան ընդգծած է, որ անհրաժեշտ է Սփիւռքի
նախարարութեան կողմէ ստեղծուած ցանցն աւելի առարկայական օգտագործել եւ այդ աշխատանքներուն
մէջ ներգրաւել նաեւ արտերկրի մէջ ՀՀ դեսպանութիւնները:
| All the contents on this site are copyrighted ©. |