Papa viziton të dielën famullinë e shën Maria Jozefa në Castelverde di Lunghezza, në Romë.

Të dielën më 19 shkurt, Papa Françesku do të shkojë në lagjen romake Ponte di Nona, për t’u takuar me komunitetin e famullisë kishtare të Shën Maria Jozefa e Zemrës së Jezusit, në sheshin me të njëjtin emër, në Castelverde di Lunghezza. Papa Bergoglio do të pritet nga Vikari papnor për dioqezën e Romës, kardinali Agostino Vallini, ipeshkvi ndihmës i sektorit lindor, imzot Giuseppe Marcianbate, famullitari don Francesco Rondinelli, vikari i famullisë don Luca Bazzari e shumë meshtarë tjerë të prefekturës së XVIII të dioqezës së Romës.

Është e trembëdhjeta vizitë e Papës  Françesku në një famulli kishtare të dioqezës së Romës, e dyta  brenda pak më shumë se një muaj: më 15 janarin e kaluar, pati vizituar famullinë kishtar të Shën Marisë në Setteville, në Guidonia.

Programi i vizitës së kësaj të diele, parashikon, menjëherë pas arritjes së Atit të Shenjtë Françeskut, një takim me fëmijët dhe të rinjtë e katekizmit e me një grup të rinjsh, në teatrin e famullisë. Pastaj do të jetë takimi i Papës me të sëmurët, këndej me familjet dhe veprimtarët e qendrës së Karitasit kishtar, që kujdesët për mase 200 familje të varfëra të zonës.

Shën Gjon Pali II e pati vizituar këtë komunitet kishtar më 16 dhjetor të vitit 2001, e me atë rast pati kremtuar Meshën e dhuruar famullisë “Krishtin e kryqëzuar”, një pikturë në pëlhurë me “La Pietà,”që sot është vendosur mbi altar. Kisha famullitare që do të vizitohet nga Papa është një Kishë e re, përuruar më 2 tetor 1989, dhe i kushtohet  shën Maria Josefa Sancho de Guerra, themelueses së Kongregatës së Shërbëtoreve të Jezusit të Dashurisë, kanonizuar më një tetor të vitit 2000.