Festa e Zojës së Lurdë dhe Dita e të Sëmurit në dioqezën e Sapës

Në festën e Zojës së Lurdë, më 11 shkurt, kur Kisha katolike kremton edhe Ditën botërore të Sëmurit, edhe Kisha dioqezane e Sapës, në Katedralen “Shën Nënë Tereza e Kalkutës”, në Vau –Dejës, e kremtoi këtë ngjarja bashkë me rreth 100 persona me Aftësi Ndryshe. Qe një ditë kremtimi, reflektimi e afërsie plot dashuri e kujdes ndaj atyre vëllezërve e motrave që çdo ditë përballen me vuajtje shkaktuar nga sëmundja e shpesh edhe nga vetmia a mënjanimi.

Në homelinë e Meshës, administratori dioqezan i Sapës, dom Simoni, mes tjerash, iu drejtua të sëmurëve me këto fjalë: Të dashur të sëmurë, në bashkësinë e Kishës është rezervuar për ju një vend i veçantë. Gjendja e vuajtjes në të cilën jetoni dhe dëshira për të rifituar shëndetin ju bëjnë veçanërisht të ndjeshëm për vlerën e shpresës. Në përkujtimin e Zojës së Lurdit, po ju besoj ndërmjetësimit të Marisë: Ajo ju ndihmoftë që ta forconi dhe pasuroni virtytin e shpresës që t’i jepni një kuptim të ri vuajtjes duke e shndërruar atë në një rrugë ungjillëzimi dhe shëlbimi”. Po më hollësisht të ndjekim shërbimin e Violeta Marashit..

KREMTIMI I ZOJËS SË LURDIT NË SAPË

Në Ditën Botërore të XXV të të Sëmurëve, që kremtohet në Ditën e festës së Zojës së Lurdit, edhe Caritas Dioqezan Sapa organizoi kremtimin e ditës së të sëmurëve. Besimtarë të shumtë nga famullitë e dioqezës kanë shtegtuar drejt Katedrales për t’iu bashkuar këtij kremtimi, solemn të kësaj dite mbajtur në Katedralen “Shën Nënë Tereza e Kalkutës”, në Vau –Dejës.

Meshën Solemne festive, të së shtunës së 11 shkurtit e udhëhoqi Administratori Dioqezan i Sapës, Dom Simon Kulli, në bashkëkremtim me shumë meshtarë  të tjerë të dioqezës. E veçanta e kësaj dite ishte prania e të gjithë personave me Aftësi Ndryshe.

Rreth 100 persona të tillë ishin të pranishëm në Meshën Shenjte, ku kisha posaçërisht sot i kushton një kujdes të veçantë këtyre personave që vuajnë në vuajtjet e trupit dhe atyre që me dashuri e mirësi kujdesen që t’ua lehtësojnë vuajtjet.

Gjatë homelisë së rastit dom Simon Kulli tha se “në këtë ditë dëshiroj që të nxisë besimtarët katolikë dhe njerëzit vullnetmirë që t’i rikthejnë kuptimin dhe vlerat e jetës, të dinë të bashkëpunojnë me Zotin dhe mësimin e tij, dhe në këtë mënyrë të bëhen ndërtuesit e shpresës dhe jetës më të lumtur. Të gjithë duhet të angazhohemi që të paraqesim shëndetin dhe sëmundjet nën dritën e Ungjillit, të inkurajojmë promovimin dhe mbrojtjen e jetës dhe të dinjitetit njerëzor që nga të ngjizurit e deri në momentin e fundit. Të dimë të jetojmë Ungjillin autentik, diakonik (në shërbim) duke e parë në të sëmurin vetë Jezu Krishtin, sikurse edhe është identifikuar me ta. Duke vazhduar më tej, dom Simoni iu drejtua të sëmurëve me këto fjalë: Të dashur të sëmurë, në bashkësinë e Kishës është rezervuar për ju një vend i veçantë. Gjendja e vuajtjes në të cilën jetoni dhe dëshira për të rifituar shëndetin ju bëjnë veçanërisht të ndjeshëm për vlerën e shpresës. Në përkujtimin e Zojës së Lurdit, po ju besoj ndërmjetësimit të Marisë: Ajo ju ndihmoftë që ta forconi dhe pasuroni virtytin e shpresës që t’i jepni një kuptim të ri vuajtjes duke e shndërruar atë në një rrugë ungjillëzimi dhe shëlbimi.

E kremtja e Zojës së Lurdit u përmbyll me procesion tradicional me Truporen e Zojës rreth shenjtërores së vendosur në oborrin e Shtëpisë së Bamirësisë.

Më pas, sipas traditës, Caritas Sapa në bashkëpunim me stafin dhe vullnetarët shtroi drekën vëllazërore me të sëmurët, ku së bashku kaluan momente feste, gëzimi e argëtimi me njëri-tjetrin. 

Violeta Marashi nga Vau-Dejes