Urdhëri i Maltës: falenderojmë Papën për zgjidhjen e shpejtë të krizës

Urdhëri i Maltës falenderon Papën Françesku për zgjidhjen e shpejtë të krizës së kohëve të fundit. Dje, në një konferencë shtypi në Romë, Kancelari i Madh i Urdhërit, Albrecht von Boeselager, u sqaroi gazetarëve çështjen.

Ai vetë u shkarkua nga detyra në dhjetor, por u kthye në funksionin e vet në janar, pasi Ati i Shenjtë kërkoi dorëheqjen e Mjeshtrit të Madh, Fra’ Matthew Festing. Kancelari mundi të hedhë poshtë akuzat, sipas të cilave ai kishte lejuar përhapjen e kontraceptivëve gjatë veprimtarive asistenciale të Urdhërit në Azi e në Afrikë. “Jam besnik ndaj mësimeve të Kishës”, deklaroi von Boeselager për gazetarët, duke nënvizuar se ndërhyrja e Atit të Shenjtë nuk e dhunon aspak sovranitetin e Urdhërit të Maltës, sepse ka të bëjë me përmasën fetare të tij e jo me statutin. Synimi i Papës, theksoi më tej, është forcimi i misionit të Urdhërit e jo dobësimi i tij. Përsa i përket Legatit papnor, që akoma duhet emëruar, von Boeselager shpjegoi se ai do të përqendrohet në aspektet fetare dhe në rolin e anëtarëve të Urdhërit.

Kancelari i Madh nënvizoi se misioni i Urdhërit do të vijojë të favorizojë ndihmën, sidomos shëndetësore, për miliona njerëz, që ikin nga lufta, dhuna e mjerimi. “Jemi të alarmuar e të shqetësuar – pohoi – për qëndrimet diskriminuese ndaj emigrantëve, bazuar mbi kombësinë. Historia na jep shembuj të shumtë, që dëshmojnë pasojat dramatike dhe të shëmtuara të politikave, bazuar mbi prejardhjen dhe etninë. Njëkohësisht, Urdhëri i Maltës mban qëndrim kundër indiferencës në rritje për të drejtat humanitare, të sanksionuara me Konventën e Gjenevës. Ato norma – shpjegoi – jo vetëm janë nga më të injoruarat, por publikisht sfidohen dhe hidhen poshtë nga shtetet e ndryshme”. Von Boeselager ripohoi impenjimin e Urdhërit të Maltës për të bashkëpunuar me OKB-në në favor të refugjatëve sirianë në Libi. Kriza e fundit shkaktoi një rënie të vogël të donacioneve, por jo aq të rëndësishme.

Së fundi, Kancelari i Madh falenderoi edhe Sekretarin e Shtetit të Vatikanit, kardinalin Pietro Parolin, Komisionin hetimor formuar nga Papa dhe vetë Fra’ Festing, që dha dorëheqjen. Zgjedhja e pasardhësit të Mjeshtrit të Madh do të bëhet gjatë tre muajve të ardhshëm, siç parashikohet nga Kushtetuta, por data nuk është caktuar akoma.