Papa Françesku mbajti sot audiencën e përgjithshme në Sallën Pali VI, duke vijuar ciklin kushtuar shpresës së krishterë. E, gjatë katekizmit, u ndalua fort tek qëndrimi i njerëzve përballë shpresave të kota, që burojnë nga idhujt e shpresës së vërtetë, asaj që nuk të zhgënjen kurrë. Shpresat e rreme shiten e blihen, e vërteta është falas – theksoi – duke e ndriçuar katekizmin me shembuj konkretë, të jetuar.
Ne na pëlqejnë idhujt. – pohoi - Madje shumë:
“Nganjëherë në Buenos Ájres, më duhej të shkoja nga një kishë në tjetrën, duke kaluar përmes një parku, ku qenë vendosur ca tryeza të vogla. Aty rrinin gjithë ditën fallxhorët . E turma e njerëzve rrinte me orë në radhë për t’i dëgjuar parafoljet e tyre. E ata flisnin gjithnjë të njëjtat fjalë: “një grua e paske në jetën tënde... edhe një hije e paske... e edhe një dritë më duket se po të afrohet... kaq ishte vegimi, që pastaj duhej paguar”.
Papa Françesku e tregoi këtë episod, duke shtuar, jashtë tekstit zyrtar:
“Kjo të jep siguri. Sigurinë e një marrëzie, që arrin deri atje, sa të të shtyjë të thuash: isha tek fallxhiu a tek vegimtarja e tani ndjehem shumë më mirë!”.
Kështu vërejti Papa, që vijoi t’u rrëfente besimtarëve të mbledhur me shumicë në Sallën Nervi:
“Kjo më kujton filmin ‘Mrekulli në Milano’. Ç’fytyrë, ç’hundë... 100 lira. Ky, po, është idhull. Shkojmë e blejmë shpresa të rreme; e ç’bëjmë, pastaj me shpresën e vërtetë, me atë, që është falas? Kësaj nuk i besojmë edhe aq shumë. Na kënaqin shumë më tepër shpresat që blihen, shpresat kalimtare, që duket se na i jep ndonjë idhull”.
E, për ta konkretizuar më tej këtë mendim, Françesku më pas citoi Psalmin 115:
“Idhujt e tyre janë argjend e ar,
Vepra të dorës njerëzore.
Gojë kanë, po s’flasin,
kanë sy, e s’shohin,
Vrimat e hundës i kanë
Po me ta nuk nuhasin.
Duart e tyre nuk prekin,
Këmbët s’u ecin,
nga gryka nuk u del
kurrnjëfarë zëri.
U bëftë si ata, kush i thadron,
Si ata, kush u beson!
All the contents on this site are copyrighted ©. |