Սէուտական Արաբիոյ դեսպանը այցելեց Հայ Կաթողիկէ Պատրիարքարան

Լիբանանի մօտ Սէուտական Արաբիոյ դեսպան՝  տիար Ուալիտ Պախարի, հինգշաբթի 29 դեկտեմբեր 2016-ի կէսօրին այցելեց Հայ կաթողիկէ պատրիարքարան եւ ընդունուեցաւ Տանն Կիլիկիոյ կաթողիկէ Հայոց Ամենապատիւ եւ Գերերջանիկ Տէր Գրիգոր Պետրոս Ի. Կաթողիկոս Պատրիարքին կողմէ, որուն փոխանցեց 17 յունուար 2017-ին Եարզէի պալատին մէջ գումարուելիք իսլամ եւ քրիստոնեայ մշակոյթներուն նուիրուած հանդիպումին մասնակցելու հրաւէրը։ Այնուհետեւ տեղի ունեցած խօսակցութիւնը շօշափեց երկրին քաղաքական, տնտեսական, ընկերային եւ այլ մարզերուն վերաբերեալ հարցեր՝ լիբանանեան նոր կառավարութեան կազմութեան լոյսին տակ։ Սէուտցի գործավարին այցելութիւնը միաժամանակ առիթ մը եղաւ բարեմաղթանքներ փոխանակելու Նոր Տարուան սեմին։