Հալէպի Արեւելեան թաղամասերէն սկսած է բնակիչներու եւ զինեալներու հեռացումը
«Պի.Պի.Սի.» կը հաղորդէ, որ Հալէպի մէջ ընթացք առած է բնակիչներու եւ զինեալներու` ընդդիմադիր զինեալ ուժերու վերահսկողութեան տակ գտնուող թաղամասերէն հեռացումը:
Բնակիչներու, զինեալներու եւ վիրաւորներու դուրս բերումը պէտք է սկսէր չորեքշաբթի օր, սակայն հաստատուած զինադադարի խախտումը խոչընդոտեց աշխատանքներու ձեռնարկումը:
Սուրիական բանակը այս շաբաթ քառամեայ պայքարէ ետք իր վերահսկողութեան տակ առաւ զինեալ խմբաւորումներու տիրապետութեան տակ գտնուող արեւելեան Հալէպի գրեթէ բոլոր շրջանները:
Սուրիական պետական պատկերասփիւռի կայանը նախապէս հաղորդած էր. «Չորս հազար զինեալներ եւ անոնց ընտանիքները հինգշաբթի օր դուրս պիտի բերուին (Հալէպի) արեւելեան շրջաններէն»:
Թուրքիոյ փոխվարչապետ եւ կառավարութեան բանբեր Նուման Քուրթուլմուշ երէկ նշեց, որ Թուրքիա կը քննարկէ Սուրիոյ մէջ Հալէպէն դուրս բերուողներու համար ճամբարի մը ստեղծման կարելիութիւնը:
Ան նշեց, որ Հալէպէն կրնայ 80 հազարէն 100 հազար մարդ դուրս բերուիլ:
Սուրիոյ նախագահ Պաշշար Ասատ երէկ յայտնեց, որ Հալէպի ազատագրումը ներկայիս գրուող պատմութիւն է` աւելցնելով, որ Հալէպի ազատագրումէն ետք սուրիական, շրջանային ու միջազգային կացութիւնն ու քաղաքի ազատագրումէն առաջ տիրած կացութիւնը նոյնը չեն:
| All the contents on this site are copyrighted ©. |