Ngushëllimi i Papës për viktimat e aksidentit ajror në Kolumbi

Papa Françesku shpreh ngushëllime për viktimat e aksidentit ajror, që ndodhi në Kolumbi, natën ndërmjet së hënës e të martës. Dy, telegramet: njëri me firmën e Sekretarit të Shtetit, kardinalit Pietro Parolin, dërguar kryeipeshkvit të Brazilias, kardinalit Sérgio da Rocha, ndërsa tjetri, me firmën e zëvendësit të Sekretarisë së Shtetit, imzot Angelu Becciu, për ipeshkvin e Sonsón-Rionegro, imzot Fidel León Cadavid Marín.

         Ndër pasagjerët e avionit, edhe skuadra e futbollit e Chapecoense. Vetëm gjashtë vetë kanë mbijetuar nga aksidenti, në të cilin gjetën vdekjen 71 të tjerë. Arsyet e rënies së avionit, në zonën ndërmjet Brazilit dhe Medelinit, akoma nuk dihen me saktësi, por mund të jenë o defekt elektrik, o mungesë karburanti. Papa Françesku shpreh tronditjen për tragjedinë dhe siguron lutjet e veta që të prekurit nga ky mort të kenë ngushëllimin e shpresës së krishterë.

         Edhe sot, Ati i Shenjtë e përmendi aksidentin në audiencën e përgjithshme:

         “Dua të kujtoj dhimbjen e popullit brazilian për tragjedinë e skuadrës së futbollit e të lutem për lojtarët e vdekur e për familjet e tyre”.

         Papa e krahasoi këtë tragjedi me atë italiane të vitit 1949, kur ra avioni, që sillte nga Lisbona, skuadrën “Gran Torino”. Më 4 majin e 67 vjetëve më parë, viktimat qenë 31. Ndërkaq, dje, në kishën e Chapeco-s, u kremtua mesha për shpirtin e 71 viktimave të aksidentit, në të cilën morën pjesë mijëra vetë, që më pas, shkuan drejt Arenës Conda për t’i bërë homazhe klubit të futbollit.