Францішак прыме рэжысёра Марціна Скарсэзэ

30 лістапада 2016 г. раніцай Святы Айцец Францішак прыме на прыватнай аўдыенцыі амерыканскага рэжысёра Марціна Скарсэзэ, паведамілі 29 лістапада 2016 г. у Зале Друку Апостальскай Сталіцы. Сустрэча будзе праходзіць у ватыканскім Апостальскім палацы.

Візіт сусветнавядомага кінатворцы ў Рым звязаны з закрытай прэм’ерай яго мастацкай стужкі пра езуітаў-місіянераў у Японіі. Паказ фільма “Маўчанне” (Silence) па рамане Сюсаку Энда, які зладзіла студыя “Paramount”, адбыўся 28 лістапада ў Папскім усходнім інстытуце.

“Маўчанне” – ключавая праца ў творчасці Энда. Галоўны герой твора – партугальскі святар-езуіт, які ў XVII стагоддзі прыбывае ў Японію ў якасці місіянера. Ён быў схоплены, падвергнуты катаванням і быў вымушаны на словах адмовіцца ад сваёй веры. Аднак у рэчаіснасці законнік працягвае сваю місію таемна.

Скарсэзэ імкнуўся зняць фільм на аснове кнігі японскага пісьменніка больш за 20 гадоў. Сусветная прэм’ера “Маўчання” пройдзе 23 снежня.