Венгерскія палітыкі - абаронцы хрысціян з візітам у Ватыкане

Венгерскія палітыкі распавялі ў Ватыкане аб сваёй дзейнасці на карысць хрысціян, якія падвяргаюцца пераследу. 23 лістапада 2015 г. структуры Святога Пасаду наведалі: парламенцкі дзяржаўны сакратар Міністэрства чалавечых рэсурсаў Бэнчэ Рэтвары і намеснік дзяржсакратара Падсакратарыяту па абароне і дапамозе хрысціянам, якія падвяргаюцца пераследу,Тамас Торок. 

Палітыкі былі прыняты сакратаром па адносінах Апостальскай Сталіцы з дзяржавамі, арцыбіскупам Полам Рычардам Галахерам. Яны таксама сустрэліся з прэфектам Кангрэгацыі па справах Усходніх Касцёлаў, кардыналам Леанарда Сандры і сакратаром Папскай рады “Iustitia et pax”, арцыбіскупам Сільвана Тамазі.

Пасля візіту ў Ватыкан Бэнчэ Рэтвары і Тамас Торок заўважылі, што хрысціяне – гэта найбольш пераследаваная рэлігійная група ў свеце, але навіны пра гэта рэдка з’яўляюцца ў сводках навін сучасных СМІ. Задача спецыяльнай ўрадавай структуры, у якую яны ўваходзяць, заключаецца ў прыцягненні ўвагі да гэтай праблемы.

Падсакратарыят па абароне і дапамозе хрысціянам, якія падвяргаюцца пераследу быў створаны ў Венгрыі пасля жнівеньскай сустрэчы членаў Міжнароднай каталіцкай сеткі заканадаўцаў. Яна праходзіла ў Італіі з удзелам Прэзідэнта Венгрыі Віктара Орбана і была прысвечана сітуацыі хрысціян на Блізкім Усходзе. Улічваючы старажытныя хрысціянскія традыцыі Венгрыі, лідэр гэтай краіны прыняў рашэнне аб стварэнні спецыяльнай структуры, пакліканай бараніць вызнаўцаў Хрыста ва ўсім свеце.