Հաղորդագրութիւն Ֆրանչիսկոս Պապին Իրլանտայի Վարչապետին շնորհած ունկնդրութեան մասին։
(Ռատիօ Վատիկան) Սուրբ Աթոռի մամլոյ գրասենեակը հրատարակեց հաղորդագրութիւն մը որուն մէջ նշեց թէ այսօր` 28 նոյեմբեր 2016-ի առաւօտեան, Ֆրանչիսկոս Սրբազան Քահանայապետը, առաքելական պալատին մէջ ընդունեց Իրլանտայի Վարչապետը` Տիար Էնտա Քեննին զոր ապա հանդիպում ունեցաւ Սուրբ Աթոռի Պետական Քարտուղար` Կարդինալ Փիէթրօ Փարոլինին հետ, որուն կ՛ընկերանար Պետութիւններու հետ յարաբերութիւններու քարտուղարը գերապայծառ Փոլ Կալլակէր։
Մտերմիկ խօսակցութիւններու ընթացքին, շեշտուեցան Սուրբ Աթոռի եւ Իրլանտայի միջեւ տիրող լաւ յարաբերութիւնները, ու ընդգծուեցաւ Կաթողիկէ Եկեղեցւոյ` ընկերային ու դաստիարական մարզէն ներս բերած սատարը, ապա շեշտը դրուեցաւ քրիստոնեաներու դերին վրայ, մասնաւորապէս ամէն անհատի արժանապատուութեան յարգանքի ու զարգացումի բնագաւառէն ներս, ու յատկապէս ամենէ տկարներուն ու անպաշտպաններուն նկատմամբ։
Զրոյցը ապա շարունակուեցաւ անդրադարձ կատարելով Եւրոպայի մասին ու յատկապէս ակնարկելով գաղթականութեան երեւոյթին,երիտասարդներու աշխատանք ապահովեցնելու հարցին ինչպէս նաեւ ցամաքամասի դիմագրաւած հիմնական մարտահրաւէրներու մասին ըլլայ քաղաքական ըլլայ գերտեսչական գետնի վրայ։
| All the contents on this site are copyrighted ©. |