Ватыканскія наборы для філатэлістаў і нумізматаў

Ватыканскае філатэлістычна-нумізматычнае бюро падрыхтавала некалькі калекцыйных набораў з уласнай прадукцыяй за мінулы год, якія з 6 снежня 2016 г. стануць даступныя для калекцыянераў. 

Адзін з іх прысвечаны Надзвычайнаму Юбілейнаму Году Міласэрнасці, які праходзіў у Каталіцкім Касцёле з 8 снежня 2015 г. па 20 лістапада 2016 г. Ён ўключае ў сябе памятную ватыканскую манету наміналам у 2 еўра, якая была адчаканена спецыяльна да гэтай падзеі. На ёй размешчана іканаграфічная выява св. Марціна Турскага, які здымае плашч і аддае яго беднаму. Аўтарам выявы з’яўляецца італьянская мастачка і скульптар Марыянджэла Крышоці, якая ўжо на працягу некалькіх гадоў супрацоўнічае з філатэлістычна-нумізматычным бюро Ватыкана. 

Таксама ва ўзгаданы набор увайшлі дзве паштовыя маркі, выпушчаныя ў 2016 г. да ўрачыстасцяў Беззаганнага Зачацця Найсвяцейшай Панны Марыі і Хрыста Валадара Сусвету. Кошт памятнага камптекту скаладзе 46 еўра.

Аналагічны набор быў выпушчаны з нагоды 200-годдзя Ватыканскай жандармерыі. Ён уключае ў сябе манету наміналам у 2 еўра, з выявай купалу базылікі св. Пятра і профілю ватыканскага жандарма, а таксама дзве маркі, прысвечаныя юбілею ватыканскай праваахоўнай структуры. Кошт набору таксама складае 46 еўра.

У дадатак да абодвух камплектаў ідуць спецыяльныя карткі з выявай рэпрадукцый марак і пячаткай Ватыканскага філатэлістычна-нумізматычнага бюро.

Калекцыянеры змогуць таксама набыць традыцыйны набор з усёй ватыканскай філатэлістычнай прадукцыяй за 2016 г. Ён будзе выпушчаны ў чатырох моўных версіях: італьянскай, французскай, англійскай і нямецкай. Яго кошт складзе 79 еўра.