Rreth 950 milion besimtarë, në të gjithë botën, kapërcyen Portën Shenjte gjatë Vitit Jubilar të Mëshirës. Natyrisht, këtu përfshihen jo vetëm shtegtarët e ardhur në Romë, por edhe ata, që e kanë kapërcyer Portën Shenjte në dioqezat e në shenjtëroret e vendeve të tyre. Statistikën e dha kryetari i Këshillit Papnor për Nxitjen e Ungjillëzimit të Ri, imzot Rino Fisichella, pikë referimi për Vitin Shenjt.
Në konferencën për shtyp, me rastin e përfundimit të Jubileut të jashtëzakonshëm të Mëshirës dhe me rastin e paraqitjes së Letrës Apostolike të Papës Françesku “Misericordia et misera”, në Sallën e Shtypit të Vatikanit, imzot Fisichella deklaroi se në Romë, gjatë Vitit Shenjt, kanë ardhur mëse 21 milion shtegtarë. Gjithashtu, ai nënvizoi edhe se dëshira e Papës ishte që besimtarët ta provonin Mëshirën Hyjnore për t’u bërë edhe ata mjete të kësaj Mëshire.
All the contents on this site are copyrighted ©. |