Parolin: paqja e dalë nga bisedimet në Siri t’u japë garanci të krishterëve

Ndërsa vazhdojnë dy ofensiva kundër xhihadistëve të Shtetit Islamik, në Siri e në Irak, mbetet kritike gjendja e të krishterëve. Të përzënë nga tokat e tyre, të persekutuar nga okupatorët fundamentalistë, bashkësitë e rajonit presin me besim fundin e luftës. Për ta u fol në një konferencë triditore me titull “Damasku, prizma e shpresës”, me rastin e 100-vjetorit të Institutit Papnor Lindor të Romës.

Fitorja mbi të ashtuquajturin “Kalifat” të Isis-it është përparësi për kthimin e të krishterëve në tokat e tyre. Nga fshatrat e sulmuar në verilindje të Sirisë e deri në të larguarit nga Mosuli, në Irak, pritet fundi i luftës për të rifilluar jetën. Sekretari i Shtetit të Vatikanit, kardinali Pietro Parolin, shpjegoi:

“Shpresojmë që gjendja po vihet udhës së drejtë për të arritur së pari, në armëpushim e, pastaj, në përfundimin e luftës e në një zgjidhje me bisedime. Ja, këtu ngul gjithnjë këmbë Selia e Shenjtë: palët duhet të ulen së bashku e të kërkojnë një rrugëdalje. Kjo është shpresa jonë. Shpresojmë edhe që skenarët e rinj ndërkombëtarë – krijuar nga zgjedhjet në SHBA-të, me presidentin e ri – t’i shërbejnë këtij qëllimi. Ne shpresojmë që kjo zgjidhje të ketë parasysh edhe të krishterët: ata duhet të jenë plotësisht banorë të tokës e të vendit të tyre, në mënyrë që të kontribuojnë, ashtu si qytetarët e tjerë, në ndërtimin e shoqërisë, në të cilën duhet të ndjehen pjesë përbërëse”.

Në Irak, dalëngadalë po ripopullohen fshatrat e Pllajës së Ninives, megjithëse pjesa më e madhe e të krishterëve mbetet në kampet e refugjatëve në Kurdistanin irakian. Kritike, edhe gjendja në Haleb të Sirisë, ku 250 mijë vetë ndodhen të rrethuar në lagjet lindore. Të dëgjojmë prefektin e Kongregatës për Kishat Lindore, kardinalin Leonardo Sandri:

“Fatkeqësisht, të gjitha lajmet na shkaktojnë ankth, vuajtje, shqetësim për dhimbjen e tmerrshme të vëllezërve tanë, sidomos në Haleb, por edhe në të gjithë Lindjen e Mesme. Pavarësisht nga kjo panoramë negative dhe e errët, ne i lutemi Zotit për dritën e paqes, të mirëkuptimit, të dialogut, të takimit ndërmjet gjithë njerëzve të Lindjes së Mesme, ndërmjet të gjitha feve; e që veçanërisht të krishterët të jenë gjithnjë pikë ekuilibri në këtë rajon të dashur”.

Solidaritet për të krishterët e Sirisë dhe të Irakut, edhe nga bashkësia e Tokës Shenjte. Ja ç’tha në konferencë, administratori apostolik i Patriarkatit latin të Jeruzalemit, imzot Pierbattista Pizzaballa:

“Nuk ka të krishterë, që të mos flasë për vëllezërit e vet në Siri e në Irak. Është bukur, kur sheh kaq solidaritet. Të gjitha bashkësitë e krishtera shprehin solidaritet, edhe konkret, me mbledhje fondesh e me lutje për vëllezërit e tyre të krishterë. I admirojnë për dëshminë, që po japin, e edhe inkurajohen prej tyre. Me problemet e shumta të Tokës Shenjte, dëshmia e të krishterëve të Sirisë e të Irakut u jep guxim të krishterëve të zonës të ecin përpara me forcë. Si në gjithë Lindjen e Mesme, edhe në Tokën Shenjte – në Izrael e Palestinë – ka fenomene ekstremizmi, që shqetësojnë, sepse nuk janë më episode, aty-këtu, si dikur, por bëjnë pjesë në rryma ideologjike problematike. Por, mendoj se ka akoma kohë për t’i bllokuar këto situata, që në pjesën tjetër të Lindjes së Mesme mbeten jashtë kontrolli”.